(សេអ៊ូល)៖ មន្ត្រីជាន់ខ្ពស់​កូរ៉េខាងជើងម្នាក់​ នៅថ្ងៃសុក្រនេះ​បាននិយាយថា ប្រទេសរបស់លោក​ នៅតែចង់បើក​កិច្ចសន្ទនា​ជាមួយ​សហរដ្ឋអាមេរិក ហើយ​ដែល​នេះ​​គឺជាចម្លើយឆ្លើយតប​ទៅនឹង ការសម្រេចចិត្ត​លុបចោលជំនួប​ជាមួយ​លោក គីម ជុងអ៊ុន ពីសំណាក់​ប្រធានា​ធិបតីអាមេរិក លោក ដូណាល់ ត្រាំ។ នេះបើតាមការ​ចេញផ្សាយ​ដោយ ទីភ្នាក់ងារសារព័ត៌មាន យ៉ុនហាប់ នៅព្រឹកថ្ងៃសុក្រ ទី២៥​ ខែឧសភា ឆ្នាំ២០១៨។

ថ្លែងនៅក្នុង​សេចក្ដីថ្លែងការណ៍​ចេញផ្សាយដោយ​សារព័ត៌មាន​រដ្ឋ KCNA អនុរដ្ឋមន្ត្រី​ការបរទេស​កូរ៉េខាងជើង លោក គីម គ្យេក្វាន (Kim Kye-gwan) បានគូស​បញ្ជាក់​ដូច្នេះថា «យើងនៅតែ​មានឆន្ទៈអង្គុយ​ចុះចរចា​ មួយទល់​នឹងមួយជាមួយ​សហរដ្ឋអាមេរិក ក៏ដូចជា​ដោះស្រាយ​បញ្ហាគ្រប់​ពេលវេលា និងគ្រប់ទម្រង់​ទាំងអស់»។ លើសពីនេះ​ទៅទៀត មន្ត្រីជាន់ខ្ពស់​កូរ៉េខាងជើង​រូបនេះ ក៏បានចាត់ទុក​ដែរថា ការ សម្រេច​ចិត្តរបស់លោក ត្រាំ គឺជារឿងគួរ​ឱ្យសោកស្ដាយ​ជាទីបំផុត ប៉ុន្តែលោក​ថាកូរ៉េខាងជើង​នៅតែបើកទ្វារ​ចរចាជាមួយ​សហរដ្ឋអាមេរិក គ្រប់ពេលវេលា។

គួរបញ្ជាក់ថា កាលពីថ្ងៃព្រហស្បតិ៍ លោក ដូណាល់ ត្រាំ បានបង្កភាពភ្ញាក់​ផ្អើល តាម​រយៈការប្រកាសលុបចោលជំនួបកំពូល​ជាប្រវត្តិ សាស្ត្រ​ជាមួយលោក គីម ជុងអ៊ុន ដែលគ្រោង​នឹងធ្វើឡើង​ក្នុងប្រទេសសិង្ហបុរី នៅថ្ងៃទី១២ ខែមិថុនាខាងមុខនេះ ដោយសារ​តែ​ការបញ្ចេញ​កំហឹង និងចេតនាចង់បង្ក​រឿងដោយបើកចំហ​​នៅ​ក្នុង​​សេចក្តី​ថ្លែង​ការណ៍​​មួយ​​ចំនួន នាពេលថ្មីៗនេះ​ពីសំណាក់​រដ្ឋាភិបាល ទីក្រុង​​ព្យុងយ៉ាង​ ដែលបាន​ព្រមលុបចោល​ជំនួបនេះជា​បន្តបន្ទាប់៕