(អាមេរិក)៖ ទីបំផុត​ភាពស្រពិចស្រពិល​លែងមានទៀត​ហើយ បន្ទាប់ពី​​​លោក ដូណាល់ ត្រាំ បានសរសេរលិខិត​មួយច្បាប់​ ផ្ញើទៅកាន់​លោក គីម ជុងអ៊ុន ដោយ​ផ្ទាល់ថា ​គម្រោងជំនួប​កំពូលរវាងអាមេរិក​ និងកូរ៉េខាងជើង ដែលបម្រុងធ្វើ​ឡើងនៅប្រទេស​សិង្ហបុរី នាថ្ងៃទី១២ ខែ​មិថុនា ខាងមុខ នឹងមិនកើត​ឡើងនោះ​ឡើយ។ នេះបើតាម​សេចក្តីប្រកាស​របស់​សេតវិមាន ដកស្រង់​ដោយ​សារព័ត៌មាន Fox News នៅយប់​ថ្ងៃ​ព្រហស្បតិ៍ ទី២៤ ខែឧសភា ឆ្នាំ២០១៨។

បើតាម​លិខិត​របស់លោក ត្រាំ ដែលត្រូវបានប្រកាស​ជាសាធារណៈ​ដោយ​សេតវិមាន មូលហេតុនៃការ​សម្រេចចិត្ត​លុបចោលជំនួប ដែល​គ្រប់​គ្នា​បាន​​ទន្ទឹង​រង់​ចាំយ៉ាង​អន្ទះសានេះ គឺដោយសារ​តែ​ការ​បញ្ចេញ​កំហឹង និងចេតនាចង់បង្ក​រឿងដោយ​បើកចំហ​ នៅ​ក្នុង​សេចក្តី​ថ្លែង​ការណ៍​មួយ​ចំនួន នាពេលថ្មីៗនេះ ពីសំណាក់រដ្ឋាភិបាល​ទីក្រុង​ព្យុងយ៉ាង​។ ដូច្នេះហើយ លោក ដូណាល់ ត្រាំ បាន​សម្រេចថា នាខណៈ​ពេលនេះ វាពុំមែនជាពេល​វេលាសាកសម ដើម្បីបើក​កិច្ចប្រជុំនេះ​ឡើយ។

យ៉ាងណាមិញ​នៅក្នុងនោះ លោក ត្រាំ នៅតែបានបង្ហាញពីឆន្ទៈ​ចង់ជួបមុខគ្នាដដែល បើអាចនៅថ្ងៃណាមួយ​ផ្សេងទៀត នាពេលអនាគត​​ ហើយសម្រាប់​ពេលនេះវិញ លោក បានថ្លែងអំណរគុណ​ដល់​លោក គីម សម្រាប់ការដោះលែង​លែងជនជាតិអាមេរិក​ចំនួន ០៣នាក់ ពី​​កូរ៉េ​ខាងជើង​ឲ្យត្រឡប់មកកាន់​ប្រទេសកំណើត គឺមកជួបជុំក្រុម​គ្រួសាររបស់​ពួកគេវិញ ដោយ​វាគឺជាកាយ​វិការដ៏ល្អមួយ។

ជាចុងក្រោយ​លោក ដូណាល់ ត្រាំ បានបង្ហាញការ​សោកស្តាយថា ពិភពលោក​ជាពិសេសនោះ គឺកូរ៉េខាងជើង​តែម្តង បានបាត់បង់ឱកាស​​ដ៏វិសេសមួយ សម្រាប់ការបង្កើត​សន្តិភាពដែល​យូរអង្វែង ព្រមទាំងវិបុលភាព​ក៏ដូចជាភាពស្តុកស្តម្ភ​អស្ចារ្យ ហើយការបាត់បង់​ឱកាសនេះ​ ពិតជារឿងពិតជា​គួរឲ្យសោកស្តាយ​មែនទែន នៅក្នុងប្រវត្តិសាស្រ្ត​ពិភពលោក។

គួរជម្រាបថា ការសម្រេចចិត្ត​របស់លោក ត្រាំ ត្រូវបាន​ធ្វើឡើង​ចំពេលដែលអនុរដ្ឋមន្រ្តី​ការបរទេស​កូរ៉េខាងជើង បាន​បញ្ជាក់ថា ការចរចា ឬការប្រឈមមុខ​ដាក់គ្នា​ដោយ​អាវុធ​នុយក្លេអ៊ែរ គឺអាស្រ័យទាំង​ស្រុង​លើការ​សម្រេចចិត្ត និងអាកប្បកិរិយា​​របស់​សហរដ្ឋអាមេរិក ហើយ​លោកស្រី ក៏បានបញ្ចេញប្រតិកម្ម​ខឹងសម្បារផងដែរ ចំពោះការលើក​ឡើងរបស់​អនុប្រធានាធិបតី​អាមេរិក លោក ម៉ៃក៍ ភែន (Mike Pence​) ដែលថា​ កូរ៉េខាងជើង​អាចនឹងបញ្ចប់វាសនា​​ដូចប្រទេស​លីប៊ី បើសិនជា​​មិនព្រមចរចា​រឿង​នុយក្លេអ៊ែរ​ជាមួយ​សហរដ្ឋអាមេរិក៕