(តេហេរ៉ង់)៖ មេដឹកនាំកំពូលអ៊ីរ៉ង់ លោក អាយ៉ាតូឡាហ៍ អាលី ខាមេណៃ (Ali Khamenei) បានដាក់លក្ខខណ្ឌសំខាន់ៗមួយចំនួន ដើម្បីបន្តស្ថិតនៅក្នុងកិច្ចព្រមព្រៀង នុយក្លេអ៊ែរកាលពីឆ្នាំ២០១៥។ លក្ខខណ្ឌទាំងនោះ រួមមានការការពារការលក់ផលិតផលប្រេង និងពាណិជ្ជកម្មរបស់អ៊ីរ៉ង់ជាដើម បើពុំដូច្នោះទេទីក្រុងតេហេរ៉ង់នឹងចាប់ផ្ដើមកម្មវិធីនុយក្លេអ៊ែរឡើងវិញ។ នេះបើតាមការចេញផ្សាយដោយសារព័ត៌មាន BBC នៅរសៀលថ្ងៃព្រហស្បតិ៍ ទី២៤ ខែឧសភា ឆ្នាំ២០១៨។
ការដាក់លក្ខខណ្ឌរបស់លោក Khamenei ធ្វើឡើងនៅចំពេលអង់គ្លេស បារំាង និងអាល្លឺម៉ង់ កំពុងព្យាយាមរក្សាកិច្ចព្រមព្រៀងនុយក្លេអ៊ែរអ៊ីរ៉ង់កាលពីឆ្នាំ២០១៥ បន្ទាប់ពីលោក ដូណាល់ ត្រាំ ប្រកាសដកសហរដ្ឋអាមេរិកចេញពីកិច្ចព្រមព្រៀងនេះ។
លក្ខខណ្ឌទាំងអស់របស់មេដឹកនាំកំពូលអ៊ីរ៉ង់រួមមាន៖
១៖ មហាអំណាចអឺរ៉ុបត្រូវតែការពារការលក់ផលិតផលប្រេងអ៊ីរ៉ង់ ពីទណ្ឌកម្មរបស់សហរដ្ឋអាមេរិក និងបន្តទិញប្រេងឆៅពីអ៊ីរ៉ង់។
២៖ ធានាគារអឺរ៉ុបត្រូវតែការពារពាណិជ្ជកម្មជាមួយអ៊ីរ៉ង់។
៣៖ អង់គ្លេស បារាំង និងអាល្លឺម៉ង់ត្រូវសន្យាថា មិនស្វែងរកកិច្ចចរចាស្ដីពីមីស៊ីលបាលិស្ទីគ និងសកម្មភាពរបស់អ៊ីរ៉ង់នៅក្នុងតំបន់ តាមការស្នើពីសហរដ្ឋអាមេរិកនោះទេ។
ប៉ុន្តែទន្ទឹមគ្នា លោក Khamenei ក៏បានព្រមានដែរថា បើសិនជាលក្ខខណ្ឌទាំងបីនេះមិនត្រូវបានអនុវត្តន៍នោះ អ៊ីរ៉ង់នឹងចាប់ផ្ដើមអភិវឌ្ឍន៍កម្មវិធីនុយក្លេអ៊ែររបស់ខ្លួនឡើងវិញ។
គួរជម្រាបថា កាលពីថ្ងៃចន្ទរដ្ឋមន្ត្រីការបរទេសអាមេរិក លោក ម៉ៃក៍ ប៉ុមប៉េអូ (Mike Pompeo) ទណ្ឌកម្មប្រឆាំងនឹងអ៊ីរ៉ង់ ដែលត្រូវបានលើកលែងក្រោយកិច្ចព្រមព្រៀងនុយក្លេអ៊ែរកាលពីឆ្នាំ២០១៥ នឹងត្រូវអនុវត្តន៍ជាថ្មី ហើយថាទីក្រុងវ៉ាស៊ីនតោន នឹងដាក់ទណ្ឌកម្មធ្ងន់ធ្ងរបំផុត មិនធ្លាប់មានប្រឆាំងនឹងទីក្រុងតេហេរ៉ង់ បើមិនបញ្ឈប់សកម្មភាពគំរាមកំហែងអ៊ីស្រាអែល និងសម្ព័ន្ធមិត្តអាមេរិកក្នុងតំបន់មជ្ឈិមបូព៌ាទេនោះ៕
