(ហ្សាការតា)៖ ក្រសួងដឹក​ជញ្ជូន​ឥណ្ឌូណេស៊ី បានចេញ​សារណែនាំ ​ដើម្បីជូនដំណឹង​ដល់យន្តហោះដឹកអ្នក​ដំណើរនានា ឲ្យ​បង្កើន​​ការ​ប្រុង​ប្រយ័ត្ន​​​​​ខ្ពស់​​អំពី​កម្អែរផេះ​ដែលបាញ់ចេញ​​ពីភ្នំភ្លើងសកម្មជាង​គេបំផុត នៅក្នុង​ប្រទេសនេះ​មាន​ឈ្មោះថា Merapi នៅលើ​កោះជ្វា។ នេះបើ​តាម​​ការចេញ​ផ្សាយ​ដោយ ទីភ្នាក់ងារ​ព័ត៌មាន​ចិន ស៊ីនហួរ នៅរសៀល​ថ្ងៃព្រហស្បតិ៍ ទី២៤ ខែឧសភា ឆ្នាំ២០១៨។​

ភ្នំភ្លើង Merapi ដែលស្ថិតនៅ​តំបន់ព្រំដែននៃខេត្តជ្វា​ភាគកណ្តាល និងខេត្ត យ៉ូកយ៉ាការតា (Yogyakarta) បានផ្ទុះឡើងជា​លើកទី ៥ នៅក្នុងសប្តាហ៍នេះ ដោយ​បានជះកម្អែរផេះ​ឡើងលើផ្ទៃអាកាស​​កម្ពស់ដល់ទៅ ៦,០០០ម៉ែត្រ ខណៈប្រជាជន​ដែលរស់នៅក្បែរ​តំបន់រងផល​ប៉ះពាល់ ត្រូវបាន​អាជ្ញាធរ​ឥណ្ឌូណេស៊ី ណែនាំឲ្យប្រើប្រាស់​ម៉ាស់ពាក់​ការពារផ្លូវដកដង្ហើម ក៏ព្រោះតែកម្អែរ និងផេះនោះ​ពោពេញដោយ​សារធាតុពុល។

គួរជម្រាបថា ភ្នំភ្លើង​ដែល​ជាភ្នំភ្លើង​​សកម្មបំផុតក្នុងចំណោម​ភ្នំភ្លើង​សកម្មទាំង ១២៩ របស់ឥណ្ឌូណេស៊ីនេះ​បានផ្ទុះ​ជារឿយៗ​ ចាប់តាំង​ពី​​ឆ្នាំ​១៩៤៨មក៕