(គូឡាឡាំពួរ)៖ អតីតនាយករដ្ឋ​មន្ត្រីម៉ាឡេស៊ី លោក ណាជីប រ៉ាហ្សាក់ ដែល​កំពុង​ប្រឈមមុខ​នឹងការស៊ើបអង្កេត​ លើសំណុំរឿងពុក​រលួយ បានត្រឡប់​មកកាន់ទីស្នាក់ការ​គណៈកម្មការ​ស៊ើបអង្កេត​ ប្រឆាំងអំពើពុក​រលួយ​ម៉ាឡេស៊ី (MACC) នៅព្រឹក​ថ្ងៃព្រហស្បតិ៍ ដើម្បីទទួលការ​សួរចម្លើយ​ជាលើកទី ២។ នេះបើតាម​ការចេញផ្សាយ​ដោយ ទីភ្នាក់ងារ​សារព័ត៌មាន​ចិន ស៊ីនហួរ នៅព្រឹកថ្ងៃព្រហស្បតិ៍ ទី២៤ ខែឧសភា ឆ្នាំ២០១៨។

លោក ណាជីប បានធ្វើដំណើរមកដល់ MACC នៅម៉ោង៩៖៤៥នាទីព្រឹក (ម៉ោងនៅក្នុងតំបន់) ដោយស្លៀកពាក់អាវធំខាងក្រៅពណ៌ ខ្មៅ និងលើកដៃបន្ដិចទាំងទឹកមុខញញឹមទៅកាន់អ្នកសារព័ត៌មាន មុនដើរចូលក្នុងអគារ MACC។ លោក ណាជីប បានបង្ហាញខ្លួន ចំពោះគណៈកម្មាមួយនេះម្ដងរួចមកហើយ កាលពីថ្ងៃអង្គារកន្លងទៅ ដើម្បីស្រាយបំភ្លឺពាក់ព័ន្ធនឹងសំណុំរឿងនៃទំនាក់ទំនងរវាងលុយ ១០.៥៥លានដុលា្លរនៅក្នុងគណនីផ្ទាល់ខ្លួនរបស់លោក និងក្រុមហ៊ុន SRC International ដែលមានជាប់ទាក់ទិននឹងមូលនិធីរដ្ឋ 1MDB៕