(អាមេរិក)៖ កែវយឺតអវកាស TESS របស់អង្គការ NASA ដែលទើបត្រូវបានបាញ់បង្ហោះកាលពីខែមុន ដើម្បីឲ្យទៅបំពេញបេសកកម្មតាមរុករកភពអេលៀននៅជុំវិញផ្កាយ ដែលនៅក្បែរៗព្រះអាទិត្យនោះ បានធ្វើដំណើរហោះទៅកៀកនឹងឋានព្រះច័ន្ទនៅចម្ងាយ ៨,០០០គីឡូម៉ែត្រ។ នេះបើតាមការដកស្រង់ការផ្សាយចេញពីវែបសាយ Space.com នៅរសៀលថ្ងៃសៅរ៍ ទី១៩ ខែឧសភា ឆ្នាំ២០១៨។
ការហោះទៅក្បែរព្រះច័ន្ទបែបនេះ ត្រូវបានរចនាឡើង ក្នុងគោលបំណងជួយដល់ការធ្វើដំណើររបស់កែវយឺត TESS នៅក្នុងគន្លងគោចរជុំវិញភពផែនដី ដែលពុំមានយានអវកាសណាមួយ ធ្លាប់បានកាន់កាប់ (ស្ថិតនៅតំបន់គន្លងនោះ) ពីមុនមកនោះឡើយ។ បើតាមទីភ្នាក់ងារអវកាសនេះ គន្លងគោចរដែលមានរាងពងក្រពើស្តួចខ្លាំងនេះ នឹងអនុញ្ញាតឲ្យ TESS អង្កេតមើលផ្ទៃមេឃបានធំទូលាយ។
គួរជម្រាបថា កែវយឺតអវកាស TESS ត្រូវគេរំពឹងថា នឹងចាប់ផ្តើមបេសកកម្មរយៈពេល ០២ឆ្នាំ របស់វា នៅពាក់កណ្តាលខែមិថុនាខាងមុខ ក្រោយបញ្ចប់ការសម្របសម្រួលឧបករណ៍ផ្សេងៗនៅលើខ្លួនវា។ យ៉ាងណាមិញ TESS បានថតយករូបភាពសាកល្បងលើកដំបូងរបស់វារួចស្រេចទៅហើយ ដែលបង្ហាញពីក្រុមផ្កាយជាង ២០០,០០០ដួង នៅភាគខាងត្បូងកញ្ចុំផ្កាយ Centaurus ដោយប្រើប្រាស់កាមេរ៉ាមួយក្នុងចំណោមកាមេរ៉ាទំនើបៗទាំង ០៤ ដែលបំពាក់នៅលើនោះ៕
