(រុស្ស៊ី)៖ ខណៈនាពេលកន្លងទៅតែងតែមានការមើលមុខគ្នាមិនចំនោះ ការព្យាយាមបង្កើតទំនាក់ទំនងល្អនឹងគ្នាឡើងវិញ ហាក់ដូចជាកំពុងមានកើតមាន ស្របពេលដែលមេដឹកនាំអាល្លឺម៉ង់ លោកស្រី អាន់ជែឡា មើគែល (Angela Merkel) បានចូលរួមក្នុងកិច្ចពិភាក្សាជាមួយប្រធានាធិបតីរុស្ស៊ី លោក វ៉្លាឌីមៀ ពូទីន នៅឯទីក្រុង សូជី (Sochi) ប្រទេសរុស្ស៊ីនាចុងសប្តាហ៍នេះ។ នេះបើតាមការដកស្រង់ការផ្សាយចេញពីសារព័ត៌មានអង់គ្លេស Independent នៅព្រឹកថ្ងៃសៅរ៍ ទី១៩ ខែឧសភា ឆ្នាំ២០១៨។
ថ្លែងក្នុងសន្និសីទសារព័ត៌មានមួយ ជាមួយលោកស្រី Merkel លោក ពូទីន បានធ្វើការកោតសរសើរអំពើការចាប់ផ្តើមទំនាក់ទំនងថ្មីប្រកប ដោយសុឆន្ទៈជាមួយអាល្លឺម៉ង់ ខណៈអធិការបតីអាល្លឺម៉ង់បានយល់ស្របថា កិច្ចចរចាទាំងនេះពិតជាមានសារៈសំខាន់ ហើយវានឹងនៅតែបន្តកើតមាន នៅថ្ងៃខាងមុខទៀត។
ការវិវត្តស្ថានការណ៍នេះ គឺអាចនិយាយបានថា គួរតែអរគុណដល់ប្រធានាធិបតីអាមេរិកលោក ដូណាល់ ត្រាំ ដែលបានសម្រេចចិត្តដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរ៉ង់ ទោះបីជាសម្ព័ន្ធមិត្តអឺរ៉ុបរបស់ខ្លួន បានស្នើយ៉ាងទទូចធ្វើការគិតគូរពិចារណាឲ្យបានច្បាស់មុនធ្វើយ៉ាងដូច្នោះយ៉ាងណាក្តី បូករួមជាមួយការទាមទារ និងព្រមានឲ្យសមាជិកអង្គការ NATO បង្កើនការចំណាយលើវិស័យយោធាជាដើម។
នៅក្នុងអំឡុងនៃការធ្វើសន្និសីទខាងលើ មេដឹកនាំប្រទេសទាំងពីរបានបញ្ជាក់ថា របៀបវារៈនៃកិច្ចប្រជុំ គឺមានភាពទូលំទូលាយដូចការរំពឹងទុកប្រាកដមែន ហើយការពិភាក្សាអំពីការដាក់ទណ្ឌកម្ម គឺពុំត្រូវបានធ្វើឡើងនោះឡើយ ដោយជំនួសវិញនូវការជជែកពីបញ្ហាអ៊ីរ៉ង់ ស៊ីរី អ៊ុយក្រែន និងវិស័យថាមពល។
គួរជម្រាបថា បើតាមលោក ចូសិព ចេនណីងស៍ (Joseph Jannings) ដែលជាប្រធានការិយាល័យរបស់ក្រុមប្រឹក្សាអឺរ៉ុបទទួលបន្ទុកកិច្ចការបរទេស ទោះបីជាជំនួបនេះ ត្រូវបានគ្រោងទុកជាមុនយ៉ាងណាក្តី ប៉ុន្តែវាបានកើតឡើងចំពេលតែម្តង ដោយលោកស្រី Merkel មានបំណងចង់ឲ្យទីក្រុងវ៉ាស៊ីនតោនដឹងថា អាល្លឺម៉ង់មិនមែនពឹងផ្អែកទាំងស្រុង តែទៅលើសហរដ្ឋអាមេរិកនោះឡើយ សម្រាប់បញ្ហាអន្តរជាតិនោះ៕
