(គុយបា)៖ យន្តហោះមួយ​គ្រឿង​របស់​ក្រុមហ៊ុន Cuban Airline ជាមួយមនុស្ស ១០៤នាក់ ធ្លាក់នៅក្បែរ​​អាកាសយានដ្ឋាន​ទីក្រុង ឡាហាវ៉ាន់ (Havana) ប្រទេស​គុយបា បន្ទាប់ពីហោះ​ចាកចេញ​ពី​អាកាស​យានដ្ឋាន​ប៉ុន្មាននាទី ដោយក្នុងនោះ​​ក្រុមសង្គ្រោះ​បានរកឃើញអ្នក​នៅរស់តែ ០៤នាក់ ប៉ុណ្ណោះ ហើយដោយ​ឡែក​​មនុស្ស ១០០នាក់គត់​បានបាត់​បង់​ជីវិត។ នេះបើយោង​តាមសារព័ត៌​មាន ស៊ីនហួរ ចេញផ្សាយ​នៅព្រឹកថ្ងៃសៅរ៍ ថ្ងៃទី១៩ ខែឧសភា ឆ្នាំ២០១៨។

យន្តហោះដែល​ធ្លាក់នោះជា​ប្រភេទ Boeing 737-201 ហើយ​មិនទាន់​ដឹងពីមូលហេតុ​ច្បាស់​លាស់​នៃការធ្លាក់នៅឡើយ​​នោះទេ ដោយវា​កំពុងស្ថិត​នៅក្នុងការ​ស៊ើប​អង្កេត។ ដោយឡែក​ប្រធានាធិបតី​គុយបា លោក មីហ្គែល ឌីយ៉ាស់ ខាណែល (Miguel Diaz-Canel) បានទៅដល់​កន្លែងកើតហេតុ​ដោយផ្ទាល់ និងបានថ្លែង​តាមកញ្ចក់​ទូរទស្សន៍​ថា «នេះគឺជាព័ត៌មាន​មិនល្អ, ជនរងគ្រោះ​មានចំនួន​ច្រើនណាស់...»។

គួរបញ្ជាក់ថា យន្តហោះខាង​លើនេះមានគោលដៅ​ពីរដ្ឋធានីឡាហាវ៉ាន់ ឆ្ពោះ​ទៅកាន់​ទីក្រុង ហូលហ្គីន (Holguin) ដោយវា​ជាកម្មសិទ្ធិ​របស់​ក្រុមហ៊ុន Damojh នៃប្រទេស​ម៉ិចស៊ីកូ និងត្រូវបានជួល​ដោយក្រុមហ៊ុន​អាកាសចរណ៍​គុយបា។ បន្ថែមពីនេះ​មនុស្ស​ដែល​​នៅរស់​ទាំង ០៤នាក់ នោះគឺកំពុង​ទទួលការព្យាបាល​ក្នុងមន្ទីរពេទ្យ​ទីក្រុង​ឡាហាវ៉ាន់ ដោយមាន​បុរសម្នាក់ និងស្ត្រី​បីនាក់៕