(ម៉ានីល)៖ ពលទាហាន ០២នាក់ រួមនិងសមាជិករបស់ក្រុមអាប៊ូសាយយ៉ាហ្វ (Abu Sayyaf) ចំនួន ១០នាក់ បានបាត់បង់ជីវិតក្រោយពីមានការព្យាយាមរំដោះចំណាប់ខ្មាំង ដែលស្ថិតនៅក្នុងកណ្តាប់ដៃរបស់ក្រុមសកម្មប្រយុទ្ធនេះ។ នេះបើតាមការដកស្រង់ការផ្សាយចេញពី ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃចន្ទ ទី១៤ ខែឧសភា ឆ្នាំ២០១៨។
ការប៉ះទង្គិចគ្នាខាងលើបានកើតឡើងនៅ Tanum ដែលជាភូមិដាច់ស្រយាលមួយកន្លែង ក្នុងក្រុង ផាទីគុល (Patikul) ភាគខាងត្បូងប្រទេសហ្វីលីពីន កាលពីថ្ងៃអាទិត្យម្សិលមិញ ហើយការប្រយុទ្ធគ្នាយ៉ាងក្តៅគគុកប្រមាណជាមួយម៉ោង បានបន្សល់ទុកកងទ័ព ០២រូប និងសមាជិករបស់ Abu Sayyaf ដែលពុំស្គាល់អត្តសញ្ញាណប្រហែល ១០នាក់ស្លាប់។
មូលហេតុនៅមុនឈានទៅរកការប្រយុទ្ធគ្នានេះ គឺកងកម្លាំងរដ្ឋាភិបាលហ្វីលីពីន បានធ្វើការតាមស្វែងរកស្រ្តីជាប៉ូលិសពីររូប ដែលត្រូវបានគេចាប់ពង្រត់កាលពីខែមុន នៅក្រុង Patikul ។ មន្រ្តីប៉ូលិសទាំងពីររូបនេះ គឺស្ថិតក្នុងចំណោមចំណាប់ខ្មាំងមួយចំនួនទៀត ដែលត្រូវបានចាប់ជំរិតដោយបណ្តាញក្រុម Abu Sayyaf នៅភាគខាងត្បូងហ្វីលីពីន។
គួរជម្រាបថា Abu Sayyaf គឺជាក្រុមសកម្មប្រយុទ្ធនិយមជ្រុល នៅប្រទេសហ្វីលីពីន ដែលជារឿយៗបានធ្វើសកម្មភាពចាប់ជំរិតទារប្រាក់, បំផ្ទុះគ្រាប់បែក, និងកាត់ក្បាលមនុស្សជាដើម នៅតាមតំបន់ភាគលិចកោះ មីនដាណាវ (Mindanao) ជាពិសេសគឺនៅក្នុងសំបុករបស់ពួកគេ ដែលស្ថិតនៅលើខេត្តដីកោះ បាស៊ីឡាន (Basilan) និង ស៊ូលូ (Sulu)៕
