(គូឡាឡាំពួរ)៖ អតីតនាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់ បាននិយាយថា លោកចង់សម្រាករយៈពេលខ្លី ដើម្បីចំណាយពេលជាមួយគ្រួសាររបស់លោក តែមួយរយៈខ្លីប៉ុណ្ណោះបន្ទាប់ពីមានសេចក្ដីរាយការណ៍ថា ឈ្មោះរបស់គាត់មាននៅលើបញ្ជីជើងហោះហើរ យន្ដហោះឯកជនមួយឆ្ពោះទៅកាន់ទីក្រុងហ្សការតា ប្រទេសឥណ្ឌូណេស៊ី នៅព្រឹកថ្ងៃសៅរ៍នេះ។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅព្រឹកថ្ងៃសៅរ៍ ទី១២ ខែឧសភា ឆ្នាំ២០១៨។
យោងតាមប្រព័ន្ធផ្សព្វផ្សាយនៅក្នុងស្រុក ឈ្មោះរបស់លោក ណាជីប និងភរិយាក្នុងនាមជាអ្នកដំណើរមាននៅក្នុងបញ្ជីជើងហោះហើរ ចាកចេញពីអាកាសយានដ្ឋានមួយក្បែរទីក្រុងគូឡាឡាំពួរ ឆ្ពោះទៅកាន់ទីក្រុងហ្សាកាតា ប្រទេសឥណ្ឌូណេស៊ីនៅម៉ោង ១០៖០០នាទីព្រឹក (ម៉ោងនៅក្នុងតំបន់)។
ដោយឡែក ជុំវិញសេចក្ដីរាយការណ៍ដែរ លោក ណាជីប ផ្ទាល់បានសរសេរនៅលើ Twitter ដូច្នេះថា «បន្ទាប់ពីចំណាយពេលអស់ ០៤ទសវត្សរ៍ នៅក្នុងនយោបាយ និងយុទ្ធនាការឃោសនាបោះឆ្នោត ដែលខ្ញុំផ្ទាល់មានការសោកស្ដាយ ឬ ប្រហែលជាការសោកស្ដាយជាខ្លាំងនៅក្នុងម៉ាឡេស៊ី ខ្ញុំនឹងសម្រាករយៈពេលខ្លី ដើម្បីចំណាយពេលជាមួយគ្រួសាររបស់ខ្ញុំដែលខ្ញុំមិន បាននៅក្បែរពួកគេគ្រប់គ្រាន់នារយៈពេលប៉ុន្មានឆ្នាំមកនេះ»។
គួរបញ្ជាក់ថា លោក ណាជីប បានបាត់បង់តំណែងជានាយករដ្ឋមន្ត្រីម៉ាឡេស៊ី ដោយចាញ់គូប្រជែងរបស់លោកគឺលោក មហាធា ម៉ូហាម៉ាដ (Mahathir Mohamad) នៅក្នុងការបោះឆ្នោតសកលកាលពីថ្ងៃទី០៩ ខែឧសភា។ ប៉ុន្តែសេចក្ដីរាយការណ៍ថា លោក ណាជីប គ្រោងចាកចេញពីម៉ាឡេស៊ី កើតឡើងនៅចំពេលដែលនាយរដ្ឋមន្ត្រីថ្មី សន្យាថា នឹងបើកការស៊ើបអង្កេតលើសំណុំរឿងពុករលួយ ពាក់ព័ន្ធនឹងមូលនីតិរដ្ឋ 1Malaysia Development Berhad (1MDB) ដែលលោក ណាជីប ផ្ទាល់ជាអ្នកបង្កើត។ លោក ណាជីប ធ្លាប់បដិសេធជាច្រើនដង ថាលោកបានប្រព្រឹត្តកំហុសអ្វីដូចការចោទប្រកាន់នោះទេ៕
