(ម៉ូស្គូ)៖ ក្រសួងការពារជាតិរុស្ស៊ីបានឱ្យដឹងថា ឧទ្ធម្ភាគចក្រប្រយុទ្ធរុស្ស៊ីមួយគ្រឿងធុន Ka-52 បានធ្លាក់នៅឯភាគខាងកើតប្រទេសស៊ីរី ដោយផ្ដាច់យកជីវិតអាកាសយានិកពីរនាក់ ដែលជិះនៅលើនោះ។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃអង្គារ ទី០៨ ខែឧសភា ឆ្នាំ២០១៨។
នៅក្នុងសេចក្ដីថ្លែងការណ៍ចេញផ្សាយដោយសារព័ត៌មាន Sputnik ក្រសួងការពារជាតិរុស្ស៊ីបានបញ្ជាក់ទៀតថា ឧទ្ធម្ភាគចក្រ Ka-52 បានធ្លាក់នៅអំឡុងពេលហោះហើរពីលើដែនអាកាស នៃតំបន់ភាគខាងកើតប្រទេសស៊ីរី ចំណែកឯបញ្ហាបច្ចេកទេសអាចជាមូលហេតុ នៃគ្រោះថ្នាក់នេះ។
គួររំលឹកថា កាលពីដើមខែឧសភា យន្តហោះចម្បាំងរុស្ស៊ីធុន Su-30SM មួយគ្រឿងក៏បានធ្លាក់នៅក្នុងប្រទេសស៊ីរីផងដែរ ដោយបណ្ដាលឱ្យអាកាសយានិកទាំងពីរនាក់នៅលើយន្តហោះនោះ បានបាត់បង់ជីវិត។ យន្តហោះចម្បាំងនេះបានធ្លាក់ក្នុងអំឡុងពេលហោះហើរនៅលើផ្ទៃសមុទ្រមេឌីទែរ៉ាណេ ក្រោយពីវាទើបតែបានធ្វើដំណើរចេញពីមូលដ្ឋានទ័ពអាកាសរុស្ស៊ី ហាមៃមីម (Hmeymim) ប្រចាំនៅក្នុងប្រទេសស៊ីរី៕
