(អាមេរិក)៖ ប្រសិនបើគេតម្រូវឲ្យស្ថាប័នមួយ ធ្វើការចាត់ថ្នាក់ទៅលើខ្សែភាពយន្តអវកាសនោះ គឺពុំមាននរណាផ្សេងដែលសាកសម ជាងទីភ្នាក់ងារអវកាសអាមេរិក NASA ទៀតនោះឡើយ។ ខណៈការផ្តោតសំខាន់របស់ពួកគេ គឺជាចម្បងទៅលើការពង្រីកសមត្ថភាពឈោងឆាប់របស់យើងទៅកាន់ផ្សេងៗទៀត នៃកាឡាក់ស៊ីរបស់យើងនោះ ក្រុមស្រ្តីៗជាអ្នកវិទ្យាសាស្រ្តនៅ NASA ក៏បានឆ្លៀតឱកាសបញ្ចេញមតិយោបល់គួរឲ្យចាប់អារម្មណ៍ ទៅលើភាពយន្តអវកាសដែលល្អ និងអាក្រក់បំផុតផងដែរ។ នេះបើតាមការដកស្រង់ការផ្សាយចេញពីវែបសាយ Value Walk នៅព្រឹកថ្ងៃចន្ទ ទី២៣ ខែមេសា ឆ្នាំ២០១៨។
៥៖ សម្រាប់ខ្សែភាពយន្តអវកាស ដែលមានភាពអន់ខ្សោយបំផុត នៅក្នុងទស្សនរបស់ NASA គឺរឿង Planet of the Apes កាលពីឆ្នាំ២០០១។ ខ្សែភាពយន្តនេះ រៀបរាប់ពីដំណើររឿងនៅលើភពមួយ ដែលគ្រប់គ្រងដោយសត្វស្វា ហើយនៅក្នុងសាច់រឿងដែលមានរយៈពេលប្រមាណ ០២ម៉ោងនេះ បើតាម NASA គឺវាមានកំហុសឆ្គងផ្នែកវិទ្យាសាស្រ្តជាច្រើន ដែលអាចនិយាយបានថា មិនមែនជារឿងប្រឌិតមិនមែនបែបវិទ្យាសាស្ត្រពេញលេញ។
៤៖ ខណៈភាពយន្ត Gravity ឆ្នាំ២០១៣ ទទួលបានការកោតសរសើរជាខ្លាំង ពីក្រុមអ្នកវាយតម្លៃខ្សែភាពយន្តអង្គការ NASA ដែលជឿជាក់ថា វាគួរតែស្ថិតនៅលេខរៀងល្អ នៃបញ្ជីរឿងអវកាសល្អ ប៉ុន្តែវាបែរជាស្ថិតនៅក្នុងលេខរៀងអាក្រក់បែបនេះទៅវិញ។ បញ្ហានោះគឺដោយសារពួកគេ (អ្នកវិទ្យាសាស្ត្រ) មិនយល់ស្របចំពោះការបង្ហាញឲ្យឃើញទិដ្ឋភាពក្នុងសាច់រឿង អំពីទីភ្នាក់ងារអវកាសនេះ ដែលខុសពីធាតុពិតជាក់ស្តែងយ៉ាងឆ្ងាយ។
NASA បានបញ្ជាក់លើកឡើងថា «អ្វីៗអាចប្រែទៅជាអាក្រក់ខ្លាំងមែនទែន ហើយវាពុំមែនជាអារម្មណ៍ដែលយើងចង់ឲ្យអ្នករាល់គ្នា មានចំពោះស្ថាប័នអវកាសមួយនេះឡើយ»។ រឿង Gravity រៀបរាប់ពីដំណើររឿងនៃស្រ្តីម្នាក់ជាអវកាសយានិករបស់អង្គការ NASA ដែលនៅរសាត់អណ្តែតក្នុងទីអវកាស បន្ទាប់ពីស្ថានីយអវកាសរបស់នាង ត្រូវបានបំផ្លាញដោយបាតុភូតដ៏ខ្លាំងក្លាមួយ ហើយនាងបានធ្លាក់ចុះមកផែនដីវិញ ជាមួយនឹងបន្ទប់យានអវកាសដែលបែកខ្ទេចខ្ទីរ ធ្លាក់ចូលទៅក្នុងផ្ទៃទឹក។
៣៖ ចូលមកដល់រឿងអវកាសដែលល្អគួរសមវិញម្តង គឺភាពយន្តភាគ Star Trek: The Next Generation ពីឆ្នាំ១៩៨៧ ដល់ឆ្នាំ១៩៩៤។ ចំណុចដែលមានលក្ខណៈពិសេសមួយសម្រាប់ខ្សែភាពយន្តនេះ គឺវាបានផ្តល់ការជំរុញលើកទឹកចិត្តជាខ្លាំង ដល់អ្នកវិទ្យាសាស្រ្ត NASA ជាច្រើននាក់ ឲ្យសម្រេចឈានជើងមកក្នុងទីភ្នាក់ងារអវកាសនេះ។ Star Trek: The Next Generation និយាយអំពីដំណើរផ្សងព្រេងរបស់ក្រុមមនុស្សក៏ដូចជាក្រុមមនុស្សក្រៅភពជាច្រើនផ្សេងទៀត ក្នុងទីអវកាស ដែលជារឿងប្រកបដោយការអប់រំ និងមានភាពប្រាកដនិយមច្រើន នៅក្នុងឈុតឆាកសម្តែង។
២៖ នៅចំណាត់ថ្នាក់កំពូលទីពីរ គឺរឿង Apollo 13 ហើយអ្វីដែលជាចំណុចខ្លាំងរបស់ខ្សែភាពយន្តនេះ គឺកម្រិតនៃភាពជាក់ស្តែងក្នុងភាពយន្តអវកាសនេះ។ ខណៈរឿងភាគច្រើននៅក្នុងបញ្ជីនេះ ផ្តោតទៅលើតម្លៃនៃការកម្សាន្តអារម្មណ៍នោះ អ្នកវិទ្យាសាស្រ្តរបស់ NASA បានឲ្យដឹងថា Apollo 13 គឺដូចរឿងមែនទែនពិតៗអ៊ីចឹង។ រឿង Apollo 13 គឺត្រូវបានគេយោងទៅតាមព្រឹត្តិការណ៍ នៃបេសកកម្មបញ្ជូនមនុស្សលើកទី ៧ ទៅឋានព្រះច័ន្ទ (Apollo 13) របស់ NASA។
១៖ ទីបំផុតសម្រាប់លេខរៀងកំពូល គឺរឿង The Martian។ មូលហេតុចម្បងជាងគេនោះ គឺសាច់រឿងទាក់ទងនឹងភពអង្គារ (Mars) ជាភពដែលអង្គការ NASA បានកំណត់គោលដៅថា នឹងបញ្ជូនអវកាសយានិកទៅកាន់ទីនោះ ឲ្យបាននាពេលអនាគត ហើយខ្សែភាពយន្តនេះបានបង្ហាញឲ្យឃើញថា តើវាលំបាកប៉ុន្មានក្នុងការសម្រេចគោលដៅនេះ ជាពិសេស គឺការចុះចតលើភពអង្គារ ការគ្រប់គ្រងធនធានដែលចាំបាច់ ការដាំដុះលើភពក្រហម និងការត្រដររស់នៅក្នុងស្ថានភាពដ៏លំបាក នៅពេលគ្រោះអាសន្នកើតមានឡើងភ្លាមៗ៕
