(ហ្សាការតា)៖ ក្រុមមន្ត្រីឥណ្ឌូណេស៊ី នៅថ្ងៃសុក្រនេះបានឱ្យដឹងថា ឧទ្ធម្ភាគចក្រមួយគ្រឿង បានធ្លាក់នៅឯតំបន់ ម៉ារ៉ូវ៉ាលី (Marowali Regency) នៃខេត្ត ស៊ូឡាវេស៊ី (Sulawesi) ភាគកណ្ដាលនៃប្រទេស ដោយបណ្ដាលឱ្យមនុស្សម្នាក់ស្លាប់ និង០៩នាក់ទៀតរងរបួស ក្នុងនោះមាន០៦នាក់ ជាជនជាតិចិន។ នេះបើតាមការចេញផ្សាយដោយ ទីភ្នាក់ងារសារព័ត៌មានចិនស៊ីនហួរ នៅល្ងាចថ្ងៃសុក្រ ទី២០ ខែមេសា ឆ្នាំ២០១៨។
ថ្លែងប្រាប់ស៊ីនហួរ អ្នកនាំពាក្យក្រសួងដឹកជញ្ជូនឥណ្ឌូណេស៊ី លោក បាំបាំង អឺវ៉ាន (Bambang Ervan) បានបញ្ជាក់ថា អ្នកដំណើរ០៦នាក់ជិះនៅលើឧទ្ធម្ភាគចក្រ គឺជាជនជាតិចិន ហើយគ្រោះថ្នាក់នេះបានសម្លាប់បុគ្គលិកម្នាក់របស់ក្រុមហ៊ុន PT IMIP ដែលជាម្ចាស់ឧទ្ធម្ភាគចក្រនេះ។ ចំណែកឯពីឡុត និងសហ-ពីឡុតបានរងរបួស ខណៈបុគ្គលិកដទៃទៀត ក៏បានរងរបួសផងដែរ។
គួរបញ្ជាក់ថា មូលហេតុនៃគ្រោះថ្នាក់ឧទ្ធម្ភាគចក្រខាងលើមិនទាន់ ត្រូវបានគេបញ្ជាក់ឱ្យច្បាស់នៅឡើយទេ ដោយគ្រាន់តែគេដឹងថា ឧទ្ធម្ភាគចក្រនេះធ្លាក់នៅអំឡុងពេលរៀបចុះចត៕
