(ទុយនេស៊ី)៖ តំបន់បុរាណស្ថានថ្មី​ចំនួន​១០កន្លែង នៅភាគខាងត្បូង​ប្រទេសទុយនីស៊ី ត្រូវបានរកគេរុករក​ឃើញ ដោយសារតែបច្ចេកវិទ្យា​​នៅទីអវកាសរបស់​ប្រទេសចិន។ នេះបើតាមការ​ឲ្យដឹងពីអាជ្ញាធរ​ទុយនីស៊ី ដកស្រង់សម្តីដោយ​ទីភ្នាក់ងារ​ព័ត៌មានចិន ស៊ីនហួរ នៅ​ព្រឹក​​ថ្ងៃសុក្រ ទី២០ ខែមេសា ឆ្នាំ២០១៨។

ទីតាំងបុរាណៗ​ទាំងអស់នោះ មានអាយុកាល​បន្សល់ទុកតាំងតែពីសម័យចក្រភព​រ៉ូមមកម្ល៉េះ ដោយពួកវាស្ថិត​នៅខេត្តចំនួន០៣​ របស់ទុយនេ​ស៊ី​រួមមានខេត្ត ហ្គាហ្វាសា (Gafsa), តាតាវយូអ៊ីន (Tataouine), និង មេឌែអ៊ីនីន (Medeinine)។ ការរុករកឃើញ​ថ្មីខាងលើ រួមមានទាំងសំណង់​បន្ទាយមួយចំនួន កំពែង​ ប្រព័ន្ធ​ផ្តត់​ផ្គង់​ទឹក និង​អាងស្តុកទឹកធំៗចំនួនបី ព្រមទាំងផ្នូរ​បុរណាមួយកន្លែង។

គួរជម្រាបថា ការរកឃើញថ្មី​ទីតាំងបុរាណថ្មីនេះ ត្រូវបានធ្វើឡើង​ដោយក្រុមអ្នកវិទ្យាសាស្រ្ត​មកពីប្រទេស​ចិន អ៊ីតាលី ប៉ាគីស្ថាន និង​ទុយនី​ស៊ីផ្ទាល់ ដោយប្រើប្រាស់​បច្ចេកវិទ្យាទំនើបៗ នៃប្រព័ន្ធ Sensor ពីទីអវកាសរបស់​ប្រទេសចិន ជាលើកទីមួយ​នៅក្នុងប្រទេស​ទុយនីស៊ី នៅក្រោមកម្មវិធីឈ្មោះថា​ ខ្សែក្រវាត់ និងផ្លូវ​ឌីជីថល (DBAR)៕