(ប៉េកាំង)៖ ភ្លាមៗបន្ទាប់ពីការប្រកាសជាផ្លូវការ នៃការទទួលស្គាល់លោក Miguel Diaz-Canel ជាប្រធានាធិបតីថ្មី នៃប្រទេសគុយបានោះ លោក ស៊ី ជិនពីង ប្រធានាធិបតីនៃប្រទេសចិនបានផ្ញើសារអបអរសាទរ ចំពោះមេដឹកនាំថ្មីគុយបាផងដែរ ខណៈដែលប្រទេសទាំងពីរ មានចំណងទាក់ទងគ្នាយ៉ាងស្អិតល្មួត រាប់ទសវត្សរ៍មកហើយ។ នេះបើតាមការចេញផ្សាយនៅមុននេះបន្តិចដោយ ស៊ីនហួរ នាយប់ថ្ងៃព្រហស្បតិ៍ ទី១៩ ខែមេសា ឆ្នាំ២០១៨។
លោក Miguel Diaz-Canel ដែលទើបត្រូវបានប្រកាសបេក្ខភាពតែមួយគត់ ក្នុងការឡើងជាប្រធានាធិបតីបន្តវេនពីលោក រ៉ាអ៊ូល ខាស្ត្រូ នោះត្រូវបានសភាគុយបា សម្រេចជ្រើសតាំងជាផ្លូវការហើយ ឲ្យឡើងកាន់តំណែងប្រធានាធិបតីនៃប្រទេសដីកោះនេះតែម្តង ក្នុងអាណត្តិថ្មីដែលមានរយៈពេល ០៥ឆ្នាំ។
កាលពីថ្ងៃពុធ សភាគុយបាបានសម្រេចចិត្តតែងតាំងដៃស្ដាំរបស់លោក រ៉ាអ៊ូល ខាស្ត្រូ (Raúl Castro) គឺលោក មីហ្គែល ឌីយ៉ាស់ ខាណែល (Miguel Díaz-Canel) វ័យ ៥៧ឆ្នាំ ជាបេក្ខជនតែម្នាក់គត់ដែលនឹងត្រូវបន្តដំណែងជាប្រធានាធិបតីគុយបា ហើយនៅថ្ងៃបន្ទាប់នេះ លោកក៏បានក្លាយជាមេដឹកនាំថ្មី ដែលជាការបិទបញ្ចប់ផងដែរ នូវការដឹកនាំប្រទេសរបស់ត្រកូល Castro អស់រយៈពេលជាង ០៦ទសវត្សរ៍មកនេះ។
លោក Raúl Castro បានឡើងកាន់តំណែងជាប្រធានាធិបតីគុយបា ជំនួសបងប្រុសរបស់លោក គឺលោក ហ្វីឌែឡ ខាស្ត្រូ (Fidel Castro) តាំងតែពី ឆ្នាំ២០០៦ មកម្ល៉េះ។ ប៉ុន្តែលោកត្រូវបានគេរំពឹងថា នឹងលាលែងពីតំណែងនៅក្នុងសប្ដាហ៍នេះ បន្ទាប់ពីសភាគុយបា តែងតាំងលោក Miguel Díaz-Canel ជាបេក្ខជនតែម្នាក់គត់ ដែលនឹងត្រូវបន្តកាន់ដំណែងពីរូបលោក។
យ៉ាងណាក៏ដោយ លោក Raúl Castro ត្រូវគេជឿជាក់ដដែលថា នឹងនៅតែមានអំណាចនៅក្នុងគណបក្សកុម្មុយនិស្ដ បើទោះជាលោកលាលែងពីដំណែងក៏ដោយ ហើយម្យ៉ាងវិញ ទៀតលោកនឹងអាចដឹកនាំគណបក្សកុម្មុយនិស្ដគុយបា រហូតដល់សមាជបក្សនៅឆ្នាំ២០២១ ឯណោះ។
សម្រាប់មូលហេតុនៃការលែងពីតំណែងរបស់ លោក Castro ពេលនេះ គឺមិនទាន់មានការបញ្ជាក់ឲ្យបានច្បាស់លាស់នោះឡើយ ប៉ុន្តែបច្ចុប្បន្ននេះ លោកមានវ័យ ៨៦ឆ្នាំ ដែលវ័យជរាទៅហើយ៕
