(ពិភពលោក)៖ នៅថ្ងៃព្រហស្បតិ៍ ទី១៩ ខែមេសា ឆ្នាំ២០១៨នេះ ព្រឹត្តិការណ៍អន្តរជាតិសំខាន់ៗជាច្រើនបានកើតឡើង រួមមានទាំងព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ អាជ្ញាធរឧតុនិយមជប៉ុន (JMA) បានឱ្យដឹងថា ភ្នំភ្លើងគឺរីស៊ីម៉ា (Kirishima) ស្ថិតនៅភាគនិរតីនៃកោះ គ្យូស៊ុ (Kyushu) បានផ្ទុះនៅថ្ងៃព្រហស្បតិ៍នេះ ជាមួយការបញ្ចេញកម្អែលផេះយ៉ាងខ្មួលខ្មាញ់ទៅលើអាកាស៕
២៖ គ្រោះរញ្ជួយដីដ៏កក្រើកមួយ អាចមានកម្រិតចាប់ពី ៥.៥រ៉ិចទ័រ ទៅ ៥.៩រ៉ិចទ័រ បានវាយប្រហារតំបន់ភាគខាងត្បូងប្រទេសអ៊ីរ៉ង់ ក្បែរនឹងស្ថានីយថាមពលនុយក្លេអ៊ែរតែមួយគត់ របស់សាធារណរដ្ឋអ៊ីស្លាមមួយនេះ ប៉ុន្តែភ្លាមៗបែបនេះ ពុំទាន់មានសេចក្តីរាយការណ៍អំពីមនុស្សរងគ្រោះ ឬក៏ការបំផ្លិចបំផ្លាញបង្កឡើងដោយគ្រោះធម្មជាតិនេះ នៅឡើយទេ៕
៣៖ វិទ្យាស្ថានផលិតយន្តហោះដ្រូនយោធា (Drone) ឈានមុខគេមួយរបស់ប្រទេសចិន កំពុងធ្វើការអភិវឌ្ឍយន្តហោះដ្រូនមិនបំពាក់សព្វាវុធ ដើម្បីងាកទៅជ្រៀតចូលក្នុងទីផ្សារស៊ីវិលវិញម្តង ដែលមានការរីកដុះដាលហួសពីការរំពឹងទុក៕
៤៖ អង្គភាពទ័ពអាកាស នៃកងទ័ពរំដោះប្រជាជនចិន (PLA) បានដឹកនាំការធ្វើសមយុទ្ធយោធាបាញ់គ្រាប់ពិត នៅឯតំបន់ឆ្នេរភាគអាគ្នេយ៍ នៃប្រទេស ស្របពេលកំពុងមានភាពតានតឹងជាមួយកោះតៃវ៉ាន់ ពាក់ព័ន្ធនឹងគំរោងទិញយន្ដហោះចម្បាំង ពីសហរដ្ឋអាមេរិក៕
៥៖ អាជ្ញាធរគ្រប់គ្រងគ្រោះមហន្តរាយឥណ្ឌូនេស៊ី នៅថ្ងៃព្រហស្បតិ៍នេះ បានឱ្យដឹងថា មនុស្ស០២នាក់បានស្លាប់ និង២១នាក់ទៀត បានរងរបួស ខណៈអគារច្រើនជាង ៣០០ខ្នងត្រូវបានបំផ្លាញដោយសារតែគ្រោះរញ្ជួយដីនៅលើខេត្តជ្វា៕
៦៖ មុននឹងជំនួបផ្លូវការជាមួយមេដឹកនាំកូរ៉េខាងជើង លោក គីម ជុងអ៊ុន ត្រូវបានធ្វើឡើង ប្រធានាធិបតីអាមេរិក លោក ដូណាល់ ត្រាំ បានព្រមានទុកឱ្យហើយថាលោកនឹងដើរចេញពីកិច្ចប្រជុំភ្លាមៗ បើសិនជាកិច្ចចរចានោះ មិនលេចចេញជាផ្លែផ្កាអ្វីទេនោះ៕
