(ប៉ារីស)៖ ប្រព័ន្ធផ្សព្វផ្សាយបារាំងបានរាយការណ៍ថា បុរសជនជាតិបារាំងម្នាក់ឈ្មោះ ហ្សែរ៉ូម ហាម៉ុន (Jerome Hamon) បានក្លាយជាមនុស្សដំបូងគេនៅលើពិភពលោក ដែលទទួលការវះកាត់ប្ដូរមុខចំនួនពីរដង។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នៅល្ងាចថ្ងៃព្រហស្បតិ៍ ទី១៩ ខែមេសា ឆ្នាំ២០១៨។
លោក Jerome Hamon កំពុងសម្រាកព្យាបាលនៅឯមន្ទីរពេទ្យមួយក្នុងទីក្រុងប៉ារីស បីខែបន្ទាប់ពីទទួលការវះកាត់ប្ដូរមុខជាលើកទី ២ ដែលនេះត្រូវបានគេចាត់ទុកថា ជារឿងលើកដំបូងនៅលើពិភពលោក។ លោក Hamon មានអាយុ ៤៣ឆ្នាំ បានកើតជំងឺមួយឈ្មោះថា neurofibromatosis ប្រភេទទី ១ (ជំងឺហ្សែនម្យ៉ាងបង្កឱ្យមានដុំសាច់ធ្ងន់ធ្ងរ ខុសប្រក្រតីនៅលើផ្ទៃមុខ)។ លោកបានទទួល ការវះកាត់ប្ដូរមុខលើកទី ១ កាលពីឆ្នាំ២០១០ ប៉ុន្តែរាងកាយរបស់លោកនៅពេលនោះ បានធ្វើទុក្ខ ដោយវាជាសញ្ញាមិនទទួលស្គាល់មុខថ្មីនេះទេ ដូច្នេះទើបវាត្រូវបានក្រុមគ្រូពេទ្យវះកាត់យកចេញវិញ កាលពីឆ្នាំ២០១៧។
ការវះកាត់នេះធ្វើឱ្យបុរសរូបនេះ គ្មានមុខ គ្មានត្របកភ្នែក គ្មានត្រចៀក គ្មានស្បែកមុខ និងមិនអាចនិយាយ ឬហូបអ្វីបាននោះទេ។ គាត់ត្រូវបន្តស្នាក់នៅមន្ទីរពេទ្យរយៈពេល ០២ខែ រហូតដល់ទទួលបានការវះកាត់ប្ដូរមុខជាលើកទី ២ កាលពីខែមករា ឆ្នាំ២០១៨ ដោយទទួលអំណោយពីផ្ទៃមុខជាលើកទី ២ ដែរ។ ប៉ុន្តែនៅលើកនេះ ដើម្បីបញ្ជៀសការបដិសេធពីរាងកាយរបស់លោក ក្រុមវេជ្ជ បណ្ឌិតបានជំនួសឈាមទាំងអស់ នៅក្នុងរាងកាយរបស់ លោក Hamon មុននឹងដឹកនាំការវះកាត់។
គួរបញ្ជាក់ថា ការវះកាត់ប្ដូរមុខរបស់លោក Hamon ទទួលបានអំណោយពីបុរសម្នាក់អាយុ ៦០ឆ្នាំ ហើយជាមួយមុខទី ២ ថ្មី បុរសវ័យ ៤៣ឆ្នាំ រូបនេះបាននិយាយបែបកំប្លែងថា លោករង់ចាំពេលនេះអស់រយៈពេលរាប់ទសវត្សរ៍មកហើយ។ «ខ្ញុំមានអាយុ ៤៣ឆ្នាំ ហើយអ្នកផ្ដល់អំណោយមុខឱ្យខ្ញុំមានអាយុ ២២ឆ្នាំ។ ដូច្នេះខ្ញុំបានកា្លយជាមនុស្សមានអាយុ ២០ឆ្នាំ»។ នេះជាការលើកឡើងរបស់លោក Jerome Hamon នៅក្នុងបទសម្ភាសន៍ជាមួយទូរទស្សន៍បារាំង។
ដោយឡែក បើតាម BBC ការវះកាត់ផ្លាស់ប្ដូរមុខលើកទី ១ ត្រូវបានធ្វើឡើងកាលពីឆ្នាំ២០០៥ នៅភាគខាងជើងប្រទេសបារាំង ហើយចាប់ពីពេលនោះមក ការវះកាត់របៀបនេះចំនួន ៤០លើក កើតមានឡើងនៅលើពិភពលោក៕
