(បាងកក)៖ នាយកប្រតិបត្តិក្រុមហ៊ុន Alibaba Group លោក ជែក ម៉ា (Jack Ma) បានធ្វើដំណើរ​ទៅដល់វិមាន​រដ្ឋាភិបាល​ថៃហើយ នៅថ្ងៃព្រហស្បតិ៍នេះ ដើម្បី​ជួបពិភាក្សា​ការងារជាមួយនាយករដ្ឋមន្ត្រី​ថៃ លោក ប្រាយុទ្ធ ចាន់ អូចា និង​ឧបនាយករដ្ឋមន្ត្រី លោក សុំឃីដ ចាទូស្រីភីតាក់ (Somkid Jatusripitak) ព្រមទាំងចុះហត្ថលេខា​ផងដែរលើ ​អនុស្សណៈនៃការ​យោគយល់គ្នា (MoUs) ស្ដីពីការវិនិយោគ e-commerce និង​ទេសចរណ៍ ។ នេះបើតាមការ​ចេញផ្សាយដោយ​សារព័ត៌មាន Bangkok Post នៅរសៀលថ្ងៃព្រហស្បតិ៍ ទី១៩ ខែមេសា ឆ្នាំ២០១៨។

លោក Jack Ma បានបង្ហាញ​ខ្លួននៅវិមានរដ្ឋាភិបាល​ថៃ នៅម៉ោង ១០៖០០នាទីព្រឹកមិញនេះ រីឯលោក Somkid បានទទួល​ស្វាគមន៍ និង​នាំរូបលោកចូលបន្ទប់ប្រជុំ។ ជាមួយគ្នា​នោះដែរ បើតាម Bangkok Post មហាសេដ្ឋីចិន​រូបនេះ​ ត្រូវបានគេរំពឹងថា នឹងចុះហត្ថលេខាលើ MoUs​ ចំនួន០៤ស្ដីពីការវិនិយោគ គិតជាទឹក​ប្រាក់ជាង ១១ពាន់លានបាត (ជាង ៣៥២លានដុល្លារ) លើវិស័យ​ពាណិជ្ជកម្ម ឌីជីថល ការលើកកម្ពស់​ទេសចរណ៍​ឌីជីថល ការបណ្ដុះបណ្ដាល e-commerce សម្រាប់សហគ្រិន​ខ្នាតតូច និងមធ្យម​ជាដើម។

គួរបញ្ជាក់ថា លោក Jack Ma ក៏ត្រូវបានគេរំពឹងដែរថា នឹងបង្កើតសេវាកម្មភ្ជាប់​ទៅដោយបច្ចេកវិទ្យា​ដឹកជញ្ជូន​ទិន្នន័យ ដែលអាចនឹង បម្រើដល់ការដឹកជញ្ជូន​រវាងប្រទេសថៃ​ និងចិន រួមទាំងតំបន់​ព្រំដែន​ជាប់កម្ពុជា ឡាវ មីយ៉ាន់ម៉ា និង​វៀតណាម៕