(គុយបា)៖ សភាគុយបាបានសម្រេចចិត្តតែងតាំងដៃស្ដាំរបស់លោក រ៉ាអ៊ូល ខាស្ត្រូ (Raúl Castro) គឺលោក មីហ្គែល ឌីយ៉ាស់ ខាណែល (Miguel Díaz-Canel) វ័យ ៥៧ឆ្នាំ ជាបេក្ខជនតែ
ម្នាក់គត់ដែលនឹងត្រូវបន្តដំណែងជាប្រធានាធិបតីគុយបា ហើយក៏វានឹងក្លាយជាការបិទបញ្ចប់ផងដែរ នូវការដឹកនាំប្រទេសរបស់ត្រកូល Castro អស់រយៈពេលជាង ០៦ទសវត្សរ៍មកនេះ។ នេះបើតាមការចេញផ្សាយដោយ សារព័ត៌មាន Russian Today នៅព្រឹកថ្ងៃព្រហស្បតិ៍ ទី១៩ ខែមេសា ឆ្នាំ២០១៨។
លោក Raúl Castro បានឡើងកាន់តំណែងជាប្រធានាធិបតីគុយបា ជំនួសបងប្រុសរបស់លោក គឺលោក ហ្វីឌែឡ ខាស្ត្រូ (Fidel Castro) តាំងតែពី ឆ្នាំ២០០៦ មកម្ល៉េះ។ ប៉ុន្តែលោកត្រូវបានគេរំពឹងថា នឹងលាលែងពីតំណែងនៅក្នុងសប្ដាហ៍នេះ បន្ទាប់ពីសភាគុយបា តែងតាំងលោក Miguel Díaz-Canel ជាបេក្ខជនតែម្នាក់គត់ ដែលនឹងត្រូវបន្តកាន់ដំណែងពីរូបលោក។ យ៉ាងណាក៏ដោយ លោក Raúl Castro ត្រូវគេជឿជាក់ដដែលថា នឹងនៅតែមានអំណាចនៅក្នុងគណបក្សកុម្មុយនិស្ដ បើទោះជាលោកលាលែងពីដំណែងក៏ដោយ ហើយម្យ៉ាងវិញ ទៀតលោកនឹងអាចដឹកនាំគណបក្សកុម្មុយនិស្ដគុយបា រហូតដល់សមាជបក្សនៅឆ្នាំ២០២១ ឯណោះ។
គួរបញ្ជាក់ថា សភាគុយបាបានបោះឆ្នោតតែងតាំង លោក Miguel Díaz-Canel ជាបេក្ខជនប្រធានាធិបតីកាលពីថ្ងៃពុធ រីឯលទ្ធផលផ្លូវការគ្រោងនឹងត្រូវប្រកាស នៅថ្ងៃព្រហស្បតិ៍នេះ (ម៉ោងនៅក្នុងប្រទេសគុយបា)។ សម្រាប់មូលហេតុនៃការលែងពីតំណែងរបស់ លោក Castro ពេលនេះ គឺមិនទាន់មានការបញ្ជាក់ឲ្យបានច្បាស់លាស់នោះឡើយ ប៉ុន្តែបច្ចុប្បន្ននេះ លោកមានវ័យ ៨៦ឆ្នាំ ដែលវ័យជរាទៅហើយ៕
