(អង់ការ៉ា)៖ ប្រធានាធិបតី​តួកគី លោក តាយយ៉ីប អឺដូហ្កាន់ (Tayyip Erdogan) បានប្រកាសថា តួកគីនឹងរៀបចំ​ការបោះឆ្នោត​ប្រធានាធិបតី និងសភា​មុនអាណត្តិនៅ​​ថ្ងៃទី២៤ ខែមិថុនា​ខាងមុខនេះ ដើម្បីផ្លាស់ប្ដូរភាព​ទន់ខ្សោយ​នៃប្រព័ន្ធដឹកនាំ​ចាស់។ នេះបើតាម ការចេញផ្សាយដោយ​សារព័ត៌មាន CGTN នៅព្រឹកថ្ងៃព្រហស្បតិ៍ ទី១៩ ខែមេសា ឆ្នាំ២០១៨។

លោក អឺដូហ្កាន់ ធ្វើការកត់​សម្គាល់បែបនេះ នៅក្រោយជំនួប​ជាមួយមេដឹកនាំ​គណបក្សជាតិ​និយម MHP លោក ដេវឡេត បាសេលី (Devlet Bahceli) កាលពីថ្ងៃពុធ។ «បើទោះជា​ប្រធានាធិបតី និងរដ្ឋាភិបាល កំពុងធ្វើការងាររួមគ្នា​ក៏ដោយ ក៏ភាពទន់ខ្សោយ​នៃប្រព័ន្ធដឹកនាំ​ចាស់នៅតែ ជាបញ្ហា​ប្រឈម​ដដែល»។ នេះជាការលើក​ឡើងរបស់​លោក អឺដូហ្កាន់។ លោក អឺដូហ្កាន់ បន្ថែមថា ការវិវត្តស្ថានភាព​នៅក្នុងប្រទេស ស៊ីរីក៏​បានជំរុញឱ្យតួកគី​ ត្រូវតែផ្លាស់ប្ដូរប្រព័ន្ធ​ដឹកនាំចាស់​ផងដែរ សំដៅធ្វើយ៉ាងណា​ឱ្យតួកគី​ដើរលើផ្លូវពោពេញ​ដោយភាពរ៉ឹងមំា នៅពេល​អនាគត។

គួរបញ្ជាក់ថា លោក អឺដូហ្កាន់ បានដឹកនាំ​ប្រទេសតួកគី តាំងតែពី​ឆ្នាំ២០០២ មកម្ល៉េះ រីឯការបោះឆ្នោតប្រធានាធិបតី និងសភា ដំបូង​ឡើយគ្រោងនឹងធ្វើឡើង​នៅខែវិច្ឆិកា ឆ្នាំ២០១៩៕