(វ៉ាស៊ីនតោន)៖ សំនួរដែលមិនទាន់មានចម្លើយនោះគឺថា តើលោក ដូណាល់ ត្រាំ ប្រធានាធិបតីអាមេរិក និងលោក គីម ជុងអ៊ុន ប្រមុខដឹកនាំកំពូលផុតលេខកូរ៉េខាងជើង នឹងជ្រើសរើសទីតាំងណាមួយ នៅលើពិភពលោកយើងនេះ ដើម្បីរៀបចំជំនួបពិភាក្សាគ្នាជាលើកដំបូងបំផុត ដែលមិនធ្លាប់មានក្នុងប្រវត្តិសាស្ត្រនោះ?
យោងតាមការចេញផ្សាយរបស់ BBC ដែលត្រូវបានដកស្រង់នៅល្ងាចថ្ងៃពុធ ទី១៨ ខែមេសា ឆ្នាំ២០១៨នេះ ក្រុមអ្នកវិភាគមួយចំនួនបានលើកឡើងថា ទីតាំងចំនួន ០៥ សំខាន់ៗ អាចនឹងក្លាយជាឋានសួគ៌ នៃការជួបចរចាគ្នារវាងលោក គីម និងលោក ត្រាំ នោះគឺ ទី១៖ តំបន់គ្មានយោធារវាងកូរ៉េទាំងពីរ (DMZ), ទី២៖ ទីក្រុងប៉េកាំងប្រទេសចិន, ទី៣៖ ប្រទេសណាមួយនៅទ្វីបអាស៊ី, ទី៤៖ ប្រទេសណាមួយនៅទ្វីបអឺរ៉ុប និង ទី៥៖ នៅលើនាវាក្នុងដែនទឹកអន្តរជាតិ។ ដូចដែលលោក ត្រាំ បញ្ជាក់ហើយថា ទឹកដីអាមេរិកមិនមែនជម្រើស នៃការជួបគ្នានោះទេ។
គួរបញ្ជាក់ថា យោងតាមសារ Twitter របស់លោក ត្រាំ ដែលត្រូវបានបង្ហោះនៅថ្ងៃពុធនេះ បានបញ្ជាក់ថា «ទំនាក់ទំនងដ៏ល្អ ត្រូវបានរៀបចំឡើងនៅក្នុងជំនួបពិភាក្សា កាលពីសប្តាហ៍មុន»។ ការសរសេរសារបង្ហោះរបស់ប្រធានាធិបតីអាមេរិករូបនេះ ត្រូវបានធ្វើឡើងបន្ទាប់ពីការចុះផ្សាយព័ត៌មានដ៏គួរឲ្យភ្ញាក់ផ្អើលនេះពាសពេញពិភពលោក ហើយមន្ត្រីសេតវិមានអាមេរិក ក៏បានបញ្ជាក់ផងដែរថា កិច្ចប្រជុំកាលពីសប្តាហ៍មុន រវាងមន្ត្រីជាន់ខ្ពស់អាមេរិក និងរដ្ឋាភិបាលកូរ៉េខាងជើងនោះ គឺស្ថិតនៅក្នុងគោលដៅរៀបចំកិច្ចប្រជុំកំពូលជាប្រវត្តិសាស្ត្រ រវាងមេដឹកនាំកូរ៉េខាងជើង លោក គីម ជុងអ៊ុន និងប្រធានាធិបតី លោក ដូណាល់ ត្រាំ៕
