(សេអ៊ូល)៖ ខ្សែទូរស័ព្ទបន្ទាន់ដោយផ្ទាល់រវាងមេដឹកនាំកូរ៉េខាងជើង និងកូរ៉េខាងត្បូង អាចនឹងត្រូវបង្កើតឡើងក្នុងពេលឆាប់ៗខាងមុខនេះ (ចុងសប្តាហ៍នេះ) ដែលវាត្រូវបាន​គេមើលឃើញថា ជាភាពវិជ្ជមានថ្មីមួយ រវាងទំនាកទំនងកូរ៉េខាងទាំងពីរ រួមទាំង​សហរដ្ឋអាមេរិក គិតចាប់តាំងពីការផ្លាស់ប្តូរគោលនយោបាយថ្មីរបស់ លោក គីម ជុងអ៊ុន ចាប់តាំងពីដើមឆ្នាំ២០១៨ មកនេះ។ នេះបើតាមការចេញផ្សាយដោយ ស៊ីនហួរ នារសៀលថ្ងៃអង្គារ ទី១៧ ខែមេសា ឆ្នាំ២០១៨។

លោក អ៊ីម ជុងសឿក (Im Jong-seok) ប្រធាន​សេនាធិការផ្ទាល់ របស់ប្រធានាធិបតី​កូរ៉េខាងត្បូង លោក មូន ជែអ៊ីន បានបញ្ជាក់ក្នុង​សន្និសីទសារព័ត៌មាន​មួយ នាទីក្រុង​សេអ៊ូលថា ខ្សែទូរស័ព្ទ​ទំនាក់ទំនងបន្ទាន់ (Hotline) ដោយផ្ទាល់​រវាងមេដឹកនាំ​កូរ៉េខាងជើង លោក គីម ជុងអ៊ុន និងប្រធានាធិបតី​លោក មូន ជែអ៊ីន អាចនឹងត្រូវ​បង្កើតឡើងនៅថ្ងៃសុក្រ​សប្តាហ៍នេះ។

អ្វីដែលកាន់តែសំខាន់នោះ មេដឹកនាំ​កូរ៉េទាំងពីរ ក៏នឹងអាចធ្វើ​ការតេស្ត​ប្រព័ន្ធ​ទំនាក់ទំនង Hotline នេះដោយផ្ទាល់ នៅថ្ងៃសុក្រដដែលនោះ​ផងដែរ ប៉ុន្តែពេល​វេលាជាក់យ៉ាង​ណានោះ នៅមិនទាន់មាន​ការកំណត់ជាផ្លូវការឡើយ។ គួរបញ្ជាក់ថា លោក មូន និងលោក គីម នឹងជួបពិភាក្សាគ្នា​ជាលើកដំបូង និង​ជាប្រវត្តិសាស្ត្រ នៅថ្ងៃទី២៧ ខែមេសា ខាងមុខនេះ​នៅឯភូមិ Panmunjom ទឹកដីព្រំដែន​កូរ៉េខាងជើង៕