(បរទេស)៖ ពិតជាមានសំណល់ និងសំរាមច្រើនណាស់នៅទីអវកាស ជាពិសេសនៅគន្លងគោចរជុំវិញភពផែនដី ដែលមនុស្សហាក់មិនទាន់មានវិធី នៅក្នុងការដោះស្រាយបញ្ហាទាំងនោះឡើយ ខណៈដែលសំនួរអំពីបញ្ហានេះត្រូវបានចោទឡើងតាំងតែពីទសវត្សរ៍ឆ្នាំ១៩៦០។ នេះបើតាមការចេញផ្សាយដោយ វែបសាយ Wired នាល្ងាចថ្ងៃសៅរ៍ ទី១៤ ខែមេសា ឆ្នាំ២០១៨។
ទោះបីជាផែនការបានសម្រេច ឬមិនសំរេចក៏ដោយក៏កាកសំណល់ នៃបេសកកម្មអវកាសនានា នៅតែត្រូវបានចោលទៅទីអវកាស និងខ្លះទៀតធ្លាក់មកស្រោចផែនដីវិញ ដូចជាស្ថានីយអវកាសចិន Tiangong-1 កាលពីដើមខែមេសា នេះដូច្នោះឯង។ សម្រាប់ឆ្នាំ២០១៨ ដល់ឆ្នាំ២០២០ មានការព្យាករណ៍ថា សំណល់អវកាស នឹងមានរឹតតែច្រើន ខណៈដែលគំរោងបាញ់បង្ហោះផ្កាយរណប មានមិនតិចជាង ១២,០០០គ្រឿងនោះឡើយ នៅទូតាំងពិភពលោក។
ដោយឡែកគ្រាន់តែក្រុមហ៊ុនអវកាសឯកជន SpaceX របស់អាមេរិក ពេលនេះមានគំរោងបាញ់បង្ហោះផ្កាយរណបសរុប ៤,០០០គ្រឿង ទៅហើយនៅក្នុងដៃ។ ងាកមកលើផែនដីវិញ គ្រឿងអេឡិចត្រូនិកដែលត្រូវបានបោះបង់ចោល គឺមិនតិចជាងរាប់ម៉ឺនលានតោននោះឡើយក្នុងមួយឆ្នាំៗ។ បន្ថែមពីនេះទៀត សំណល់ផ្លាស្ទីកក៏កាន់តែកើនឡើងផងដែរ ដោយអ្នកជំនាញអះអាងថា នៅឆ្នាំ២០៥០ ខាងមុខនេះ សំណល់ផ្លាស្ទីកនៅក្នុងសមុទ្រ នឹងមានចំនួនច្រើនជាងសត្វត្រីទៅទៀត បើពុំមានការដោះស្រាយឲ្យបានទាន់ពេល។
សម្រាប់ពេលនេះ ទីអវកាសវាហាក់បីដូចជាកន្លែងចាក់សម្រាមថ្មីមួយទៀតរបស់មនុស្សទៅហើយ ដោយវត្ថុប្រមាណ ១៧០លានបំណែក កំពុងតែវិលវល់ជុំវិញភពផែនដី។ បើតាមអង្គការ NASA ឲ្យដឹងថា ក្នុងចំណោមបំណែកទាំងឡាយនោះ មាន ២០,០០០បំណែកធំជាងដុំបាល់ និង ៥០០,០០០បំណែក ធំជាងថ្មម៉ាបទៀតផង។ បន្ថែមពីនេះយ៉ាងហោចណាស់សំណល់ ២០០ដុំ បានធ្លាក់ចុះមកផែនដីវិញក្នុងមួយឆ្នាំៗជាមធ្យម ឧទាហរណ៍ដូចជា Tiangong-1 ជាដើម។
គួរបញ្ជាក់ថា បច្ចុប្បន្ននេះសំរាមអវកាស និងលើដី គឺកាន់តែអាក្រក់ខ្លាំងឡើងៗទៅហើយ ចុះទម្រាំមនុស្សមិនមានវិធីនៅក្នុងការដោះស្រាយបញ្ហា ឲ្យបានសមស្របទៅតាមស្ថានភាពជាក់ស្តែងទៀតនោះ តើវានឹងក្លាយទៅជាដូចម្តេច? ចំណុចគួរឲ្យកត់សម្គាល់ បើសំរាមអវកាសកាន់តែច្រើន នោះការធ្វើបេសកកម្មអវកាសនានា នៅថ្ងៃអនាគត ក៏នឹងរឹតតែលំបាកផងដែរ៕
