ពិភពលោក)៖ នៅថ្ងៃព្រហស្បតិ៍ ទី១២ ខែមេសា ឆ្នាំ២០១៨នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំងព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ ទីភ្នាក់ងាររុស្ស៊ីប្រចាំប្រទេសស៊ីរី បានឱ្យដឹងថា កងកម្លាំងរដ្ឋាភិបាលស៊ីរីបានដោតទង់ជាតិរបស់ខ្លួនហើយ នៅក្នុងតំបន់ហ្គូតា ភាគខាងកើត (Ghouta) តាមរយៈការគ្រប់គ្រងទីក្រុងឌួម៉ាទាំងស្រុង ខណៈក្រុមឧទ្ទាមបានសម្រេចចិត្តដកថយ ហើយដែលនេះ នឹងក្លាយជាជ័យជម្នះដ៏ធំបំផុតសម្រាប់លោកប្រធានាធិបតីស៊ីរី បាស្សា អាល់ អាស្សាដ៕
២៖ ប្រទេសតួកគីនឹងបង្កើតមូលដ្ឋានស្រាវជ្រាវ ផ្នែកវិទ្យាសាស្រ្តផ្ទាល់ខ្លួន នៅតំបន់ទឹកកកអង់តាក់ទិក នាប៉ូលខាងត្បូងភពផែនដី នាឆ្នាំ២០១៩ខាងមុខនេះ៕
៣៖ នាយករដ្ឋមន្ត្រីអូស្ត្រាលី លោក ម៉ាល់ខូម ធើនបាល (Malcolm Turnbull) បានទទួលស្គាល់ថា ច្បាប់ស្ដីពីការរារាំងការលូកដៃពីបរទេស ចូលក្នុងកិច្ចការផ្ទៃក្នុង និងនយោបាយអូស្ត្រាលី បានបំពុលដល់ទំនាក់ទំនងជាមួយចិន ហើយការថ្លែងបែបនេះរបស់លោកកើតមានឡើងបន្ទាប់ ពីមានសេចក្ដីរាយការណ៍ថា ចិនបានបដិសេធផ្ដល់ទិដ្ឋាការដល់ក្រុមមន្ត្រីអូស្រ្ដាលី៕
៤៖ កូរ៉េខាងជើងបានប្រកាសពីជោគជ័យ ក្នុងការអនុវត្តន៍ផែនការអភិវឌ្ឍន៍សេដ្ឋកិច្ចរបស់ខ្លួន កាលពីឆ្នាំ២០១៧ ទោះបីជាបានទទួលរងទណ្ឌកម្ម ដែលមានសហរដ្ឋអាមេរិកជាមេក្លោង យ៉ាងទ្រោមខ្លួនក៏ដោយក្តី៕
៥៖ កប៉ាល់នេសាទកូរ៉េខាងត្បូងមួយគ្រឿង បានបុកនាវាដឹកទំនិញមួយគ្រឿង នៅក្នុងដែនសមុទ្រភាគនិរតីប្រទេសកូរ៉េខាងត្បូង នាថ្ងៃព្រហស្បតិ៍នេះតែម្តង ដោយបង្កឲ្យអ្នកនេសាទ ០៣នាក់ស្លាប់ និង ០៣នាក់ទៀតបាត់ខ្លួន៕
៦៖ បេសកកម្មប្រកបដោយមហិច្ឆតាមួយ ទៅកាន់អាចម៍ផ្កាយដែលផ្សំឡើងដោយលោហៈធាតុ នឹងជួយអ្នកវិទ្យាសាស្រ្តបង្កើនការយល់ដឹង អំពីរបៀបផែនដី និងភពមានទម្រង់ជាថ្មដទៃទៀតបានធ្វើការវិវត្តន៍រូបរាង កាលពីរាប់ពាន់លានឆ្នាំមុន៕
