(ស៊ីដនី)៖ នាយករដ្ឋមន្ត្រីអូស្ត្រាលី លោក ម៉ាល់ខូម ធើនបាល (Malcolm Turnbull) បានទទួលស្គាល់ថា ច្បាប់ស្ដីពីការរារាំងការលូកដៃពីបរទេស ចូលក្នុងកិច្ចការផ្ទៃក្នុង និងនយោបាយអូស្ត្រាលី បានបំពុលដល់ទំនាក់ទំនងជាមួយចិន ហើយការថ្លែងបែបនេះរបស់លោកកើតមានឡើងបន្ទាប់ ពីមានសេចក្ដីរាយការណ៍ថា ចិនបានបដិសេធផ្ដល់ទិដ្ឋាការដល់ក្រុមមន្ត្រីអូស្រ្ដាលី។ នេះបើតាមការចេញផ្សាយដោយសារព័ត៌មាន Channel News Asia នៅព្រឹកថ្ងៃព្រហស្បតិ៍ ទី១២ ខែមេសា ឆ្នាំ២០១៨។
ទំនាក់ទំនងរវាងចិន និងអូស្រ្ដាលី មានភាពតានតឹងខ្លាំងកាលពីឆ្នាំ២០១៧ ដោយទីក្រុងកង់បេរ៉ាបង្ហាញពីការព្រួយបារម្ភ ចំពោះការកើនឡើងនៃឥទ្ធិពលរបស់ចិននៅក្នុងតំបន់ រហូតដល់មានការស្នើឡើងនូវច្បាប់ហាមឃាត់ ការទទួលយកអំណោយនយោបាយពីបរទេស។ មួយវិញទៀតសារព័ត៌មាន Australian Financial Review ផ្អែកប្រភពមិនបញ្ជាក់អត្តសញ្ញាណ ដែលខ្លួនទទួលបានបានអះអាងថា ក្នុងសប្ដាហ៍នេះ ចិនបានបដិសេធផ្ដល់ទិដ្ឋាការដល់ក្រុមមន្ត្រីអូស្ត្រាលី ក្នុងការចូលរួមពិធីតាំងពិព័រណ៌ពាណិជ្ជកម្មប្រចាំឆ្នាំមួយ នៅប្រទេសចិន។
ដោយឡែកជុំវិញបញ្ហានេះ ថ្លែងតាមវិទ្យុ 3AW Radio នៅថ្ងៃព្រហស្បតិ៍នេះ លោក Malcolm Turnbull បានគូសបញ្ជាក់យ៉ាងដូច្នេះថា «វាច្បាស់ណាស់ថា ភាពតានតឹងរវាងចិន និងអូស្ត្រាលី បានកើតមានឡើងក្រោយការស្នើឡើង នូវច្បាប់របស់យើងស្ដីពីការលូកដៃពីបរទេស ប៉ុន្តែខ្ញុំមានទំនុកចិត្តថា រាល់ការយល់ច្រឡំទាំងឡាយអាចនឹងត្រូវបានដោះស្រាយ»។ តែយ៉ាងណាក៏ដោយ នាយករដ្ឋមន្ត្រីអូស្រ្ដាលីរូបនេះ បានបដិសេធធ្វើអត្ថាធិប្បាយ នៅពេលត្រូវបានគេសួរពីសេចក្ដីរាយការណ៍ដែលថា ចិនបានបដិសេធផ្ដល់ទិដ្ឋាការដល់ ក្រុមមន្ត្រីអូស្ត្រាលី។
គួរបញ្ជាក់ថា កាលពីឆ្នាំមុនចិនបាននាំចូលផលិតផល និងសេវាកម្មពីអូស្ត្រាលី គិតជាទឹកប្រាក់ជាង ៧០ពាន់លានដុល្លារ ប៉ុន្តែទំនាក់ទំនងពាណិជ្ជកម្មរវាងប្រទេសទាំងពីរហាក់ដូចជាគ្រាន់តែធ្វើឡើង ក្នុងលក្ខណៈត្រឹមរក្សាតុល្យភាពប៉ុណ្ណោះ ព្រោះអូស្ត្រាលីនៅតែត្រូវ មើលទឹកមុខសហរដ្ឋអាមេរិក ដែលតែងតែក្រើនរំលឹកអូស្រ្ដាលីពីឥទ្ធិពលចិននៅក្នុងតំបន់៕
