(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បានហៅប្រធានាធិបតីស៊ីរី លោក បាស្សា អាល់ អាស្សាដ ថាជាសត្វដែលប្រើប្រាស់ឧស្ម័នពុល សម្លាប់ប្រជាជនខ្លួនឯង ខណៈលោកកំពុងពិចារណាលើការប្រើប្រាស់កម្លាំងយោធា ប្រឆាំងនឹងរដ្ឋាភិបាលស៊ីរី។ នេះបើតាមការចេញផ្សាយដោយសារព័ត៌មាន BBC នៅព្រឹកថ្ងៃព្រហស្បតិ៍ ទី១២ ខែមេសា ឆ្នាំ២០១៨។
លោក ដូណាល់ ត្រាំ ធ្វើការកត់សម្គាល់បែបនេះ បន្ទាប់ពីមានសេចក្ដីរាយការណ៍ថា មនុស្សយ៉ាងហោចណាស់ ៧០នាក់ ក្នុងនោះមាន ទាំងកុមារ និងស្ត្រីបានស្លាប់ នៅក្នុងការវាយប្រហារដោយអាវុធគីមី ពីសំណាក់កងកម្លាំងរដ្ឋាភិបាលស៊ីរី នៅក្នុងទីក្រុងឌួម៉ា កាលពីថ្ងៃសៅរ៍កន្លងទៅ។ ប៉ុន្តែទីក្រុងដាម៉ាស់ បានច្រានចោលការចោទប្រកាន់នេះ រីឯរុស្ស៊ីវិញក៏បានព្រមានដែរថា នឹងបាញ់ទម្លាក់រាល់មីស៊ីល ទាំងអស់ដែលបាញ់ចូលក្នុងទឹកដីស៊ីរី។
លោក ត្រាំ បានគូសបញ្ជាក់កាលពីថ្ងៃពុធយ៉ាងដូច្នេះថា «រុស្ស៊ីបានសន្យាថានឹងបាញ់ទម្លាក់រាល់មីស៊ីល ដែលត្រូវបានបាញ់ចូលទឹកដីស៊ីរី។ ដូច្នេះរុស្ស៊ីគួរតែត្រៀមខ្លួនឱ្យហើយទៅពីព្រោះមីស៊ីលទាំងនោះនឹងត្រូវបានបាញ់យ៉ាងល្អ ថ្មី និងឆ្លាត! អ្នកមិនគួរធ្វើជាដៃគូជាមួយសត្វ (លោក អាស្សាដ) ដែលសម្លាប់ប្រជាជនរបស់ខ្លួនឯងទាល់តែសោះ»។
គួរជម្រាបថា ក្រៅពីសហរដ្ឋអាមេរិក អង់គ្លេស និងបារាំង ក៏កំពុងពិចារណាលើការប្រើប្រាស់កម្លាំងយោធា លើកងកម្លាំងរដ្ឋាភិបាលស៊ីរីផងដែរ ប៉ុន្តែទីក្រុងម៉ូស្គូបានព្រមានថា ផលវិបាកធ្ងន់ធ្ងរអាចនឹងផ្ទុះឡើង ហើយថាការចោទប្រកាន់ថា របបដឹកនាំស៊ីរីប្រើប្រាស់អាវុធគីមី គ្រាន់តែជាលេសដើម្បីវាយប្រហារលើស៊ីរីតែប៉ុណ្ណោះ។ «ទីណាមានវត្តមានរបស់អ្នក ទីនោះនឹងមានភាពចលាចល ប៉ុន្តែ យើងសង្ឃឹមថា អ្នកនឹងត្រឡប់ទៅរកសតិសម្បជញ្ញៈរបស់អ្នកវិញ បើពុំដូច្នោះទេអ្នកនឹងត្រូវទទួលខុសត្រូវ ចំពោះផលវិបាកដ៏ធ្ងន់ធ្ងរ ដែលបង្កដោយខ្លួនឯងផ្ទាល់»។ នេះបើតាមសម្តីអគ្គរដ្ឋទូតរុស្ស៊ី ប្រចាំអង្គការសហប្រជាជាតិ៕
