(អាហ្វ្រិក)៖ យន្តហោះយោធា​​មួយគ្រឿងបានធ្លាក់ និងសម្លាប់​មនុស្សទាំងអស់ ២០០នាក់ នៅក្បែរព្រលាន​យន្តហោះ ក្នុង​ទីក្រុងមួយរបស់ប្រទេស​​អាល់ហ្សេរី នៃតំបន់​អាហ្វ្រិកខាងជើង នៅមុននេះបន្តិច។ នេះបើ​តាម​ការចេញផ្សាយ​ដោយសារព័ត៌មានរុស្ស៊ី Sputnik នារសៀល​ថ្ងៃពុធ ទី១១ ខែមេសា ឆ្នាំ២០១៨

យន្តហោះ​ខាងលើនេះ ត្រូវបានអាជ្ញាធរ​អាល់ហ្សេរី​អះអាងថា ជាប្រភេទ Il-76 ឬក៏ Il-78 (មិនទាន់​ប្រាកដ) បានធ្លាក់នៅ​ក្បែរព្រលាន​យន្តហោះ នៃទីក្រុង ប្លីដា (Blida) ក្នុងខេត្ត បួហ្វារីក (Boufarik) កាលពី​វេលាម៉ោង ៨៖០០នាទីព្រឹក ម៉ោងនៅទីក្រុង​អាល់ជីស។ ក្រោយកើតហេតុ​ភ្លាមៗ​ ក្រុមសង្គ្រោះបាន​បញ្ជូនសមាជិក ១៣០នាក់ និង​រថយន្តពេទ្យ ១៤គ្រឿង ព្រមទាំង​រថយន្តដឹក​ទំនិញ ១០គ្រឿង ទៅកាន់​កន្លែងកើតហេតុ ប៉ុន្តែពុំមានមនុស្ស​ណាម្នាក់នៅរស់ ឬក៏រងរបួសនោះ​ឡើយ។

ដោយឡែក​សម្រាប់​មូលហេតុ ដែលបង្កគ្រោះថ្នាក់​ដ៏អកុសល្យនេះ​ឡើង គឺមិនទាន់មាន​ការបញ្ជាក់នោះ​ឡើយ៕