(ញូដេលី)៖ ក្រសួងអាកាសចរណ៍​ស៊ីវិល នៃប្រទេសឥណ្ឌាបាន​បញ្ជាឲ្យមានការស៊ើប​អង្កេត​មួយ នៅថ្ងៃអង្គារនេះ​តែម្តង ករណីមាន​សេចក្តីរាយការណ៍ថា អ្នកដំណើរម្នាក់ត្រូវ​បានបង្ខំឲ្យចុះ​ចេញ​ពី​ជើងហោះហើរ​ឯកជនមួយ ដោយសារតែរូបគេត្អូញថា នៅលើ​យន្តហោះ​នោះ មានសត្វមូស​រំខានច្រើន​ពេក។ នេះបើតាម​ការចេញផ្សាយដោយ ទីភ្នាក់ងារ​ព័ត៌មានចិន ស៊ីនហួរ នាល្ងាច​ថ្ងៃអង្គារ ទី១០ ខែមេសា ឆ្នាំ២០១៨។

រដ្ឋមន្ត្រីក្រសួងខាងលើ គឺលោក សូរែស ប្រាបហ៊ូ (Suresh Prabhu) បានបង្ហោះ​​នៅក្នុង​បណ្តាញ Twitter របស់លោកថា «ខ្ញុំបានបញ្ជាឲ្យ​​មានការស៊ើប​អង្កេតមួយ​ ទៅលើ​ការ​បណ្តេញ លោកបណ្ឌិត សរ៉ាប់ រ៉ៃ (Saurabh Rai) ចុះចេញពីជើង​​ហោះហើរ​ឯក Indigo ដោយសារតែ​​លោកបានត្អូញថា នៅលើនោះ​មានសត្វមូល​ច្រើនពេកនោះ»។

បណ្ឌិត សរ៉ាប់ រ៉ៃ បានគ្រោងធ្វើដំណើរពីទីក្រុង Lucknow ទៅកាន់​ទីក្រុង Bengaluru ដោយលោកបាន​ចោទបុគ្គលិក​បម្រើការ​ លើអាកាចរណ៍​ខាងលើនេះថា បានចាប់ទាញ​លោក​ចេញពីលើ​យន្តហោះ បន្ទាប់ពីលោក​អះអាងថា នៅលើយន្តហោះ​នោះមាន​សុទ្ធតែ​សត្វមូស។ ក្រោយមក​អាកាសចរណ៍ Indigo បានចេញ​សេចក្តីថ្លែងការណ៍ច្រានចោលការចោទប្រកាន់ អំពីការប្រើទង្វើ​ឈ្លើយដាក់​បណ្ឌិតខាង​លើនេះ៕