(គូឡាឡាំពួរ)៖ បន្ទាប់ពីប្រកាសរំលោយសភា កាលពីថ្ងៃសៅរ៍កន្លងទៅ នាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់ បានចាប់ផ្ដើមយុទ្ធនាការ ស្វែងរកសម្លេងគាំទ្ររបស់លោកហើយ ដោយបានសន្យាជាច្រើនចំនុចថា លោកនឹងធ្វើឲ្យជីវភាពប្រជាជនម៉ាឡេស៊ី កាន់តែប្រសើរឡើង បើសិនជាលោកជាប់ឆ្នោតសាជាថ្មី នាអាណត្តិទី ៣។ នេះបើតាមការចេញផ្សាយដោយ សារព័ត៌មាន Channel News Asia នៅល្ងាចថ្ងៃចន្ទ ទី០៩ ខែមេសា ឆ្នាំ២០១៨។
ក្រុមកម្លាំងនយោបាយចម្រុះរបស់លោក ណាជីប គឺ United Malay National Organisation (UMNO) ដែលបានគ្រប់គ្រងប្រទេស ម៉ាឡេស៊ី គិតចាប់ពីទទួលបានឯករាជ្យមក កាលពីឆ្នាំ១៩៥៧ កំពុងរំពឹងថា អាចនឹងត្រឡប់មកកាន់អំណាចសាជាថ្មី នៅក្នុងការ បោះឆ្នោតដែលនឹងត្រូវរៀបចំឡើង នៅប៉ុន្មានសប្ដាហ៍ខាងមុខទៀតនេះ។
ប៉ុន្តែទន្ទឹមគ្នា អ្នកជំនាញមួយចំនួនដូចជា លោក Peter Mumford មកពីក្រុមហ៊ុនប្រឹក្សាយោបល់ Eurasia Group យល់ថា រឿងអាស្រូវពុករលួយរបស់លោក ណាជីប អាចនឹងធ្វើឱ្យប៉ះពាល់ ដល់ការទាក់ទាញសំឡេងគាំទ្រ ពីប្រជាជនម៉ាឡេស៊ី ជាពិសេសនៅក្នុង រដ្ឋ Johor។ «បើសិនជារដ្ឋ Johor ធ្លាក់ក្រោមការគ្រប់គ្រង របស់គណបក្សប្រឆាំង វាអាចនឹងបំផ្លាញអំណាចនយោបាយរបស់ លោក ណាជីប និងទំនឿទុកចិត្តនៅក្នុង UMNO ខណៈប្រជាជនម៉ាឡេស៊ីកំពុងខឹងសម្បារនឹងលោក ពាក់ព័ន្ធនឹងរឿងអាស្រូវពុករលួយ រាប់លានដុល្លារ»។ នេះបើតាមសម្តី លោក Peter Mumford។
គួររំលឹកថា នាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់ បានប្រកាសរំលាយសភាជាតិម៉ាឡេស៊ី កាលពីថ្ងៃសៅរ៍ ដើម្បីត្រួសត្រាយផ្លូវសម្រាប់ការបោះឆ្នោតជាតិ ក្នុងរយៈពេលកំណត់មិនឲ្យលើស ៦០ថ្ងៃ។ ពលរដ្ឋម៉ាឡេស៊ី ទាំងអស់នឹងត្រូវបោះឆ្នោត ជ្រើសរើសតំណាងរាស្ត្រចំនួន ២២២រូប ដើម្បីទៅអង្គុយនៅក្នុងសភាជាតិ ដែលម៉ាឡេស៊ីហៅថា ដេវ៉ាន់ រ៉ាក់យ៉ាត (Dewan Rakyat)៕
