(ប៉េកាំង)៖ ក្រុមហ៊ុនលក់​ទំនិញ​តាមអនឡាន​ដ៏ធំបំផុតនៅ​អាស៊ី Alibaba នៃកំពូល​មហាសេដ្ឋីចិន លោក Jack Ma បានបង្កើត​ការងារដល់​ទៅជាង ៣៦.៨លានកន្លែង កាលពីឆ្នាំ​ទៅ​មិញ​នេះ​។ នេះបើតាមការ​ចេញផ្សាយ​ដោយ ទីភ្នាក់ងារព័ត៌មាន​ចិន ស៊ីនហួរ នៅរសៀល​ថ្ងៃចន្ទ ទី០៩ ខែមេសា ឆ្នាំ២០១៨។

បណ្តាញវែបសាយ​លក់ទំនិញអនឡាញ​ជាច្រើន ដែលជាបុត្រ​សម្ព័ន្ធរបស់ Alibaba រួមមាន​ដូចជា Tmall និង Taobao ជាដើម​នោះ ដែល​​ទទួលបន្ទុក​អតិថិជន​ជាង ៥០០លាននាក់ បានផ្តល់ការងារ​ប្រមាណ ១៤.០៥លានកន្លែង ដល់បណ្តាញ​អ្នកលក់ទំនិញ​បន្តតាមអនឡាញ​​ កាលពីឆ្នាំ២០១៧។ នេះបើតាមរបាយការណ៍​ថ្មីមួយ​ របស់សាកល​វិទ្យាល័យ​ចិន Renmin។

គួរជម្រាបថា សម្លៀក​បំពាក់ និងវាយនភណ្ឌ ក៏ដូចជាបរិក្ខា​ចាំបាច់​​ប្រចាំថ្ងៃ និងសម្ភារៈប្រើប្រាស់ក្នុងផ្ទះ គឺជាទំនិញកំពូលៗ​ទាំង ៣ ដែល​បានផ្តល់ឱកាស​ការងារច្រើន​ជាងគេ។ ម៉្យាងវិញទៀត អត្រាប្រាក់​ចំណូលប្រចាំ​ឆ្នាំរបស់ក្រុមហ៊ុន Alibaba បានកើនឡើង​ដល់ទៅ ៥៦ភាគ​រយ ក្នុងអំឡុងត្រីមាសទី ៤ នៃឆ្នាំ២០១៧ផងដែរ៕