(ប៉េកាំង)៖ អតីតអគ្គលេខាធិការ នៃ​អង្គការ​សហប្រជាជាតិ លោក បាន គីមូន បានជាប់ឆ្នោត​ជាប្រធានក្រុមប្រឹក្សា​នាយកនៃវេទិកា Boao (BFA) សម្រាប់​តំបន់អាស៊ី នៅថ្ងៃចន្ទនេះ។ នេះបើតាម​ការចេញផ្សាយ​ដោយ សារព័ត៌មាន CGTN នៅរសៀលថ្ងៃចន្ទ​ ទី០៩ ខែមេសា ឆ្នាំ២០១៨។

យោងតាម CGTN លោក ចូវ ហ្ស័នឈាន់ (Zhou Xiaochuan) អតីតអភិបាល​ធនាគារ​ប្រជាជនចិន ក៏ត្រូវបានគេជ្រើសរើស​ឱ្យកាន់​តំណែងជា ប្រធានក្រុម​តំណាងឱ្យ​ប្រទេសចិន និងជាអនុប្រធាន​នៃវេទិកា Boao នេះ​ផងដែរ ខណៈអនុរដ្ឋ​មន្ត្រីការ​បរទេស លោក លី ប៉ាវទុង (Li Baodong) បានជាប់ឆ្នោត​ជា​អគ្គលេខាធិការ។

គួរបញ្ជាក់ថា វេទិកា Boao ​ឬវេទិកា​សេដ្ឋកិច្ច មានគំរូដូចជាវេទិកា​សេដ្ឋកិច្ចពិភពលោក (World Economic Forum) ផងដែរ ដែលបាននិងកំពុងប្រពឹ្រត្តទៅពីថ្ងៃទី០៨ រហូតដល់​ថ្ងៃទី១១ ខែមេសា នៅក្នុងទីក្រុង Boao ស្ថិតនៅ​ភាគខាងត្បូង​នៃ ហៃណាន (Hainan) ប្រទេស​ចិន។

វេទិកា Boao សម្រាប់ទ្វីប​អាស៊ី គឺជាអង្គការ​មិនរកប្រាក់​ចំណេញមួយ ដែលទទួលរៀបចំ​វេទិកា​ជាន់ខ្ពស់​ សម្រាប់អ្នកដឹកនាំ​មកពីរដ្ឋាភិបាលវិស័យ​ជំនួញ និងសាកលវិទ្យាល័យ​នានានៅទ្វីបអាស៊ី និងទ្វីបដទៃទៀត ដើម្បី​ចែករំលែក​ចក្ខុវិស័យ​របស់​ពួកគេ​ ទៅលើការអភិវឌ្ឍសេដ្ឋកិច្ច និងពាណិជ្ជកម្មយ៉ាងសកម្មបំផុត៕