(​សាន់ហ្វ្រាន់ស៊ីស្កូ)៖ អភិបាលរដ្ឋ អីរ៉េហ្កន (Oregon) លោកស្រី ខេត ប្រោន (Kate Brown) បាននិយាយថា លោកស្រីមិន​យល់ស្របនោះឡើយ ហើយថានឹង ជំទាស់នឹង​គំរោងបញ្ជូន​កងកម្លាំង​ឆ្មាំការពារជាតិ​ របស់លោក​ប្រធានាធិបតី ដូណាល់ ត្រាំ ទៅកាន់តំបន់​ព្រំដែនរវាង​អាមេរិក និង​ម៉ិចស៊ីកូ។ នេះបើតាម​ការចេញផ្សាយ​ដោយ ទីភ្នាក់ងារ​ព័ត៌មាន​ចិន ស៊ីនហួរ នៅល្ងាចថ្ងៃសុក្រ ទី០៦ ខែមេសា ឆ្នាំ២០១៨។

ថ្លែងប្រាប់ប្រព័ន្ធ​ផ្សព្វផ្សាយនៅ​ក្នុង​ស្រុក កាលពីថ្ងៃព្រហស្បតិ៍ លោក​ស្រី Kate Brown បានគូស​បញ្ជាក់យ៉ាងដូច្នេះថា «ខ្ញុំមិនចង់​ឱ្យកងកម្លាំង​ឆ្មាំការពារជាតិ នៃរដ្ឋ Oregon ទាំងប្រុស​ទាំងស្រី​របស់យើង ត្រូវបានគេប្រើប្រាស់​ជាកូនអុក​នយោបាយនោះ​ឡើយ»។ ដោយ​ឡែកទន្ទឹមគ្នា​នោះដែរ បើតាមស្ថានីយ​ទូរទស្សន៍ KATU2 លោក ត្រាំ មិនបានស្នើសុំ​កងកម្លាំងឆ្មាំ​ការពារជាតិ​ពីរដ្ឋ Oregon នោះទេ ប៉ុន្តែ លោកស្រីថា នឹងជំទាស់​បើសិនជាលោក ត្រាំ ស្នើឡើង​មែននោះ។

សូមជម្រាបថា ប្រធានាធិបតី​លោក ដូណាល់ ត្រាំ បានបង្ហាញការ​ចង់បានបន្ថែម​ទៀតរបស់លោក ដោយយ៉ាងហោច​ណាស់លោក ចង់​ឲ្យកងកម្លាំងក្នុង​ចំនួនពី ២,០០០នាក់ ទៅ ៤,០០០នាក់ ត្រូវដាក់​ពង្រាយ​នៅតាមតំបន់ព្រំដែន​រវាងអាមេរិក និងម៉ិចស៊ីកូ មុននឹង​ជញ្ជាំងព្រំដែន​សាងសង់រួចរាល់ បើទោះជា​រដ្ឋាភិបាល​ម៉ិចស៊ីកូ សម្តែងអារម្មណ៍​​មិនពេញចិត្ត​ខ្លាំង​ក៏ដោយ៕