(សេអ៊ូល)៖ នៅទីបំផុតដូចការរំពឹងទុក អតីតប្រធានាធិបតីកូរ៉េខាងត្បូង លោកស្រីផាក គឺនហេ ត្រូវបានតុលាការក្រុងសេអ៊ូល ផ្តន្ទាទោសឱ្យជាប់ពន្ធនាគាររយៈពេល ២៤ឆ្នាំ ពីបទពុករលួយ និងរំលោភអំណាចរដ្ឋ ថែមទាំងពិន័យជាប្រាក់ ១៧លានដុល្លារអាមេរិក។ នេះបើតាមការចេញផ្សាយនៅមុននេះបន្តិច ដោយទីភ្នាក់ងារសារព័ត៌មាន យ៉ុនហាប់ នៅរសៀលថ្ងៃសុក្រ ទី០៦ ខែមេសា ឆ្នាំ២០១៨។
លោកស្រី ផាក ត្រូវបានគេចោទប្រកាន់ពីបទល្មើសចំនួន ១៨ករណី ក្នុងនោះរួមមានទំាងអំពើពុករលួយ និងរំលោភអំណាចរដ្ឋ ជុំវិញសំណុំរឿងពុករលួយនយោបាយជាមួយគូកនលោកស្រី ឈ្មោះ ឆយ ស៊ូនស៊ីល។ លោកស្រី ឆយ គឺជាមិត្តជិតស្និទ្ធបំផុតរបស់លោកស្រី ផាក ដែលត្រូវបាន គេចោទប្រកាន់ថា ប្រើប្រាស់ និងយកអំណាចប្រធានាធិបតី ដាក់សម្ពាធលើបណ្ដាក្រុមហ៊ុនធំៗនៅក្នុងស្រុក ឱ្យបង់ប្រាក់ជាង ៧២.៦លានដុល្លារ ចូលក្នុងមូលនិធិគ្រប់គ្រងដោយស្ត្រីរូបនេះ។
គួររលឹកថា លោកស្រី ផាក គឺនហេ មានអាយុ ៦៦ឆ្នាំ បានក្លាយជាប្រធានាធិបតីដំបូងគេ ដែលត្រូវបានទម្លាក់ចេញពីតំណែង កាលពីខែមីនា ឆ្នាំ២០១៧ និងត្រូវបានចោទប្រកាន់ជាផ្លូវការ ពីបទពុករលួយកាលពីខែកុម្ភៈ ឆ្នាំ២០១៨។ យ៉ាងណាក៏ដោយ លោកស្រី ផាក នៅតែបដិសេធថា ខ្លួនមិនបានធ្វើខុសដូចការចោទប្រកាន់ទាំងអស់នោះឡើយ ។
ដោយឡែកជុំវិញសំណុំរឿងពុករលួយនេះដែរ ស្ត្រីឈ្មោះ ឆយ ស៊ូនស៊ីល ត្រូវបានផ្តន្ទាទោសដាក់ពន្ធនាគារ ២០ឆ្នាំ ពីបទពុករលួយ ក្លែងបន្លំមូលនិធិសាធារណៈ និងលូកលាន់កិច្ចផ្ទៃក្នុងរដ្ឋកាលពីថ្ងៃទី១៣ ខែកុម្ភៈកន្លងទៅ ខណៈអតីតមនុស្សជំនិតលោកស្រី ផាក គឺនហេ ម្នាក់ទៀត គឺលោក អាន ចុងប៊ុម (An Chong-bum) ត្រូវបានកាត់ទោសដាក់ពន្ធនាគារ ០៦ឆ្នាំ ពីបទឃុបឃិតជាមួយ លោកស្រី ផាក និងលោកស្រី ឆយ ស៊ូនស៊ីល នៅក្នុងពេលកាន់អំណាច៕
