(គូឡាឡាំពួ)៖ នាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់ បានប្រកាសនៅថ្ងៃសុក្រនេះថា សភាជាតិម៉ាឡេស៊ី នឹងត្រូវរំលាយនៅថ្ងៃសៅរ៍ស្អែក ដើម្បីត្រួសត្រាយផ្លូវសម្រាប់ការបោះឆ្នោតជាតិ ក្នុងរយៈពេលកំណត់មិនឲ្យលើស ៦០ថ្ងៃ ខណៈដែលលោកក៏កំពុងតែព្យាយាមស្វះស្វែងរកការគាំទ្រ ដើម្បីបន្តកាន់តំណែងជានាយករដ្ឋមន្ត្រី សម្រាប់អាណត្តិទី ៣ បន្ថែមទៀត។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នារសៀលថ្ងៃសុក្រ ទី០៦ ខែមេសា ឆ្នាំ២០១៨។
ការប្រកាសខាងលើនេះ ធ្វើឡើងដោយលោក ណាជីប រ៉ាហ្សាក់ នៅក្នុងកិច្ចប្រជុំគណរដ្ឋមន្ត្រីពិសេសមួយ ដោយក្នុងនោះលោកនាយករដ្ឋមន្ត្រី ដែលគ្របដណ្តប់ដោយរឿងអាស្រូវរូបនេះបានអះអាងថា លោកបានទទួលការអនុញ្ញាតពីព្រះមហាក្សត្រ ម៉ាឡេស៊ី ព្រះចៅ ស៊ុលតង់ មូហាំម៉េដ ទី ៥ រួចទៅហើយ នៅក្នុងការសម្រេចចិត្តរំលាយសភានៅថ្ងៃស្អែកនេះតែម្តង។
គួរបញ្ជាក់ថា សម្រាប់កាលបរិច្ឆេទនៃការបោះឆ្នោត គឺមិនទាន់ត្រូវបានប្រកាសនៅឡើយទេដោយគណកម្មការបោះឆ្នោតម៉ាឡេស៊ី ប៉ុន្តែជាធម្មតា ការបោះឆ្នោតតែងតែប្រព្រឹត្តទៅមិនឲ្យលើសពី ២ខែ នោះឡើយ បន្ទាប់ពីសភាត្រូវបានរំលាយចោល។ ពលរដ្ឋម៉ាឡេស៊ីទាំងអស់ នឹងត្រូវបោះឆ្នោតជ្រើសរើសតំណាងរាស្ត្រចំនួន ២២២រូប ដើម្បីទៅអង្គុយនៅក្នុងសភាជាតិ ដែលម៉ាឡេស៊ីហៅថា ដេវ៉ាន់ រ៉ាក់យ៉ាត (Dewan Rakyat)៕
