(វ៉ាស៊ីនតោន)៖ ក្រសួងការបរទេសអាមេរិកបានប្រកាសថា ខ្លួនបានយល់ព្រមចំពោះគម្រោងលក់សព្វាវុធថ្មីមួយផ្សេងទៀតគិតជាតម្លៃ ១.៣ពាន់លានដុល្លារ ទៅឲ្យព្រះរាជាណាចក្រអារ៉ាប់សាអូឌីត។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃសុក្រ ទី០៦ ខែមេសា ឆ្នាំ២០១៨។
បើតាមសេចក្តីថ្លែងការណ៍របស់ក្រសួងការបរទេសអាមេរិក គម្រោងខាងលើរួមមាននូវ ការលក់ប្រព័ន្ធកាំភ្លើងធំចល័តដោយស្វ័យប្រវត្តិ ដែលមានរូបរាងស្រដៀងនឹងរថក្រោះ ចំនួន ១៨០គ្រឿង។ ការបើកភ្លើងខៀវនេះត្រូវបានធ្វើឡើង ខណៈដែលព្រះរាជទាយាទអារ៉ាប៊ីសាអូឌីត ព្រះអង្គម្ចាស់ ម៉ូហាំម៉េដ ប៊ីន សាល់ម៉ាន់ (Mohammed bin Salman) កំពុងរៀបចំបញ្ចប់ដំណើរទស្សនកិច្ច ដែលមានរយៈពេលប៉ុន្មានសប្តាហ៍មកហើយរបស់ទ្រង់ នៅក្នុងទឹកដីសហរដ្ឋអាមេរិក។
គួរជម្រាបថា កាលពីថ្ងៃទី២២ ខែមីនាកន្លងទៅនេះ រដ្ឋបាលលោក ដូណាល់ ត្រាំ ក៏បានយល់ព្រមគម្រោងលក់សព្វាវុធតម្លៃ ០១ពាន់លានដុល្លារទៅឲ្យអារ៉ាប៊ីសាអូឌីតផងដែរ ដោយក្នុងនោះរួមមានមីស៊ីលប្រឆាំងរថក្រោះ ប្រមាណ ៦,៧០០គ្រាប់។ គម្រោងទាំងប៉ុន្មាននេះកើតមានឡើង បន្ទាប់ពីទទួលបានការអនុញ្ញាតពីក្រសួងការបរទេស ហើយ ត្រូវតែឆ្លងកាត់សភាអាមេរិកជាអ្នកសម្រេចបន្តទៀត៕
