(សេអ៊ូល)៖ អាកាសយានិកម្នាក់បានស្លាប់ និងម្នាក់ទៀតបានទទួលរងរបួសធ្ងន់ នៅក្នុងហេតុការណ៍ធ្លាក់យន្តហោះចម្បាំងមួយគ្រឿង នៅ​តំបន់ភាគអាគ្នេយ៍នៃប្រទេសកូរ៉េខាងជើង នារសៀលថ្ងៃព្រហស្បតិ៍នេះ។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ីនហួរ នៅល្ងាចថ្ងៃព្រហស្បតិ៍ ទី០៥ ខែមេសា ឆ្នាំ២០១៨។

យន្តហោះចម្បាំងធុន F-15K របស់ទ័ពអាកាស​កូរ៉េខាងត្បូង ដែលបានហោះចេញពី បន្ទាយយោធាមួយ​កន្លែង នៅទីក្រុង ដែគូ (Daegu) នៃខេត្ត គ្យឿងសាង (Gyeongsang) ខាងជើង បានធ្លាក់​នៅស្រុក ជីលហ្កុក (Chilgok) ក្នុងខេត្តជាមួយគ្នា ដែលស្ថិតនៅចម្ងាយ​ប្រហែលជា ២៩០គីឡូម៉ែត្រ ពីរដ្ឋធានីសេអ៊ូល ក្រោយពីធ្វើ​ដំណើរប្រមាណ​ជា ០១ម៉ោង។ បើតាមការអះអាង​ពីអាជ្ញាធរ​កូរ៉េខាងត្បូង ​នៅពេល​កើតហេតុ យន្តហោះ​ចម្បាំងនោះ កំពុងតែធ្វើដំណើរ​ទៅកាន់​មូលដ្ឋាន​របស់ខ្លួនវិញ ក្រោយពីបាន​បញ្ចប់បេសកកម្ម​មួយ។ ម៉្យាងវិញទៀត វាត្រូវគេជឿជាក់ថា បានធ្លាក់បុកចំភ្នំ​មួយកន្លែង នៅស្រុក​ខាងលើ។

គួរជម្រាបថា បើប្រភពពីយោធាកូរ៉េខាងជើង អាកាសយានិកម្នាក់ក្នុងចំណោមអាកាសយានិកពីរនាក់ នៅលើយន្តហោះខាងលើ ត្រូវគេ​បានបញ្ជាក់ទទួលស្គាល់ថាបានបាត់បង់ជីវិត និងម្នាក់ទៀតកំពុងស្ថិតក្នុងស្ថានភាព ដែលអាចគំរាមកំហែងដល់អាយុជីវិតថែមទៀតផង។ យ៉ាងណាមិញ ខណៈពេលនេះ មូលហេតុនៅពីក្រោយការធ្លាក់យន្តហោះ នៅពុំទាន់មានការបញ្ជាក់ច្បាស់នៅឡើយទេ៕