(វ៉ាស៊ីនតោន)៖ សេតវិមាន​បានប្រកាស​ថា ពុំមានកាល​បរិច្ឆេទជាក់លាស់​ណាមួយ សម្រាប់ការដក​កងទ័ព​អាមេរិក ចេញពីទឹកដី​ស៊ីរី​ឡើយ ទោះបីជា​ប្រធានាធិបតី លោក ដូណាល់ ត្រាំ បានបង្ហាញ​ភាពអន្ទះអន្ទែង​ជាច្រើនលើក ក្នុងការនាំយក​កងទ័ពរបស់លោក ចេញពីប្រទេស​​ដែលបាន និងកំពុងហែកហួរដោយ​សង្រ្គាម នៅ​តំបន់​មជ្ឈិមបូព៌ា​មួយនេះ យ៉ាងណា​ក៏ដោយ។ នេះបើតាម​ការចេញផ្សាយ​ដោយ ទីភ្នាក់ងារ​ព័ត៌​មាន​​ចិន ស៊ីនហួរ នៅរសៀលថ្ងៃព្រហស្បតិ៍ ទី០៥ ខែមេសា ឆ្នាំ២០១៨។

ថ្លែងក្នុងសន្និសីទ​សារព័ត៌មាន​នៅឯសេតវិមាន អ្នកនាំពាក្យ​លោកស្រី សារ៉ាហ៍ សេនដឺស (Sarah Sanders) បាននិយាយថា លោក​ប្រធានាធិបតី នឹងមិនកំណត់​កាលបរិច្ឆេទ​ជាក់លាក់មួយនោះ​ឡើយ ដោយលោកកំពុងតែ​ស្ទាបស្ទង់​មើល ស្ថានភាពជ័យជម្នះក្នុងសមរភូមិ​នៅទីនោះ​ គឺពុំមែនចេះ​តែដាក់​ដាក់ថ្ងៃ​កំណត់ផ្តេសផ្តាសនោះទេ។

កាលពីសប្តាហ៍មុន លោក ដូណាល់ ត្រាំ បានបញ្ជាក់ម្តងទៀត​នូវគោលបំណងរបស់លោក ក្នុងការនាំយក​កងទ័ពអាមេរិក ត្រឡប់មកពី​ស៊ីរី​វិញ ឲ្យបាននៅពេលឆាប់ៗ​ខាងមុខនេះ ដោយថាវត្តមាន​របស់យោធា​សហរដ្ឋអាមេរិក នៅតំបន់មជ្ឈិមបូព៌ា​បែបនេះ ពុំបានផ្តល់ប្រយោជន៍​​អ្វី​ក្រៅពីសេចក្តីស្លាប់ និងវិនាស​ហិនហោច ហើយត្រូវ​ចំណាយថវិកា​ច្រើន​ថែមទៀត។

គួរបញ្ជាក់ថា ទន្ទឹមនឹងនោះ ក្រសួងការពារជាតិ​ព្រមទាំងក្រសួង​ការបរទេសអាមេរិក បានលើក​ឡើងថា កិច្ចខិតខំប្រឹងប្រែង​យូរអង្វែងទៀត​ គឺចាំបាច់ដើម្បី​កម្ចាត់ក្រុមភេរវករ ISIS ឲ្យបាន​ទាំងស្រុង និងពុំឲ្យមានឱកាស​ងើបឡើង​វិញបាន។ ដោយឡែក​គិត​មក​ទល់​ពេលនេះ កង​ទ័ព​អាមេរិក​ប្រហែល ២,០០០នាក់ កំពុងឈរជើង​នៅក្នុងប្រទេស​ស៊ីរី៕