(អង់ការ៉ា)៖ ការប្រគល់ប្រព័ន្ធ​មីស៊ីលការពារដែន​អាកាសរុស្ស៊ី S-400 ឱ្យប្រទេសតួកគី ត្រូវបានគេ​កំណត់ថា នឹងត្រូវបាន​ឡើង​​នៅ​ខែកក្កដា ឆ្នាំ២០១៩ ខាងមុខនេះ ហើយវានឹងធ្វើ​ឱ្យតួកគី ក្លាយជាប្រទេសសមាជិក​អង្គការណាតូ​របស់សហរដ្ឋអាមេរិក​ដំបូងបំផុត ដែលប្រើប្រាស់ S-400។ នេះបើតាម​ប្រធានឧស្សហកម្ម​ការពារជាតិ​រុស្ស៊ី ដកស្រង់ដោយ ទីភ្នាក់ងារសារ​ព័ត៌មានចិន​ ស៊ីនហួរ នៅល្ងាចថ្ងៃពុធ ទី០៤ ខែមេសា ឆ្នាំ២០១៨។

ថ្លែងនៅលើ Twitter លោក Ismail Demir ប្រធានផ្នែកឧស្សហកម្ម​ការពារជាតិរុស្ស៊ី​បានឱ្យដឹងថា ពេលវេលានៃ​ការប្រគល់ S-400 ត្រូវបានគេកំណត់​នៅ​ខែកក្កដា ឆ្នាំ២០១៩។ ការលើកឡើង​បែបនេះ របស់លោក Demir ធ្វើឡើងបន្ទាប់ពី​ប្រធានាធិបតី​រុស្ស៊ី លោកវ្ល៉ាឌីមៀ ពូទីន បានប្រកាស​នៅឯសន្និសីទ​សារព័ត៌មាន ​ជាមួយ​សមភាគីតួកគី លោក អឺដូហ្កាន់ ក្នុងទីក្រុងអង់ការ៉ា កាលពីថ្ងៃ​អង្គារថា​ ទីក្រុងម៉ូស្គូនឹងពន្លឿន​ការប្រគល់​មីស៊ីល S-400 ឱ្យតួកគី។

គួរបញ្ជាក់ថា តួកគីបានចុះហត្ថលេខាទិញ​ប្រព័ន្ធមីស៊ីល S-400 ពីរុស្ស៊ី កាលពីខែកញ្ញា ឆ្នាំ២០១៧ ក្នុងតម្លៃជាង ០២ពាន់លានដុល្លារ ហើយបីខែ​ក្រោយទៀត ទើបប្រទេសទាំងពីរ ចុះហត្ថលេខជា​ថ្មីលើកម្ចីទិញប្រព័ន្ធ​មីស៊ីលនេះ៕