(ប៉េកាំង)៖ ចិនបានអះអាងច្បាស់ៗថា ខ្លួននឹងចាត់វិធានការឆ្លើយតបវិញ បន្ទាប់ពីសហរដ្ឋអាមេរិក បានចេញផ្សាយបញ្ជីផលិតផលចិនជាង ១,៣០០មុខ ដែលស្ថិតនៅក្រោមគំរោងតម្លើងពន្ធ ២៥ភាគរយ។ នេះបើតាមការចេញផ្សាយដោយ ទីភ្នាក់ងារសារព័ត៌មានចិន ស៊ីនហួរ នៅព្រឹកថ្ងៃពុធ ទី០៤ ខែមេសា ឆ្នាំ២០១៨។
ជុំវិញគំរោងតម្លើងពន្ធនេះដែរ សេតវិមានបានអះអាងថា ការស្នើតម្លើងពន្ធនាំចូលផលិតផលចិន ត្រូវបានធ្វើឡើង គឺជាការឆ្លើយតបទៅនឹងទីក្រុងប៉េកាំង ដែលទើបតែបានប្រកាសពីការតម្លើងពន្ធ ២៥ភាគរយ ឬស្មើនឹងជាង ០៣ពាន់លានដុល្លារ លើផលិតផល ១២៨មុខ នាំចូលពីចិន។ យ៉ាងណាក៏ដោយ ចិនបានថ្កោលទោសយ៉ាងខ្លាំង ហើយថា ខ្លួននឹងចាត់វិធានការសងសឹកនឹងការសម្រេចចិត្ត របស់ទីក្រុងវ៉ាស៊ីនតោន។
«ការសម្រេចចិត្តជាឯកតោភាគី និងមានលក្ខណៈគាំពារនិយមរបៀបនេះ គឺជាការរំលោភបំពានយ៉ាងធ្ងន់ធ្ងរលើមូលដ្ឋាន នៃគោលការណ៍គ្រឹះ និងតម្លៃរបស់អង្គការពាណិជ្ជកម្មពិភពលោក (WTO)... ដូច្នេះចិននឹងចាត់វិធានការសមស្រប ទប់ទល់នឹងសហរដ្ឋអាមេរិកវិញ»។ នេះបើតាមការគូសបញ្ជាក់របស់ស្ថានទូតចិន ប្រចាំទីក្រុងវ៉ាស៊ីនតោននៅថ្ងៃពុធនេះ។
គួរបញ្ជាក់ថា សំណើតម្លើងពន្ធរបស់សេតវិមាន លើផលិតផលនាំចូលពីចិន ១,៣០០មុខ ក្នុងនោះរួមមានផលិតផលវេជ្ជសាស្ត្រ ទូរទស្សន៍ កង់ គ្រឿងម៉ាស៊ីន រ៉ូបូត និងទំនាក់ទំនងបច្ចេកវិទ្យាជាដើម។ កាលពីឆ្នាំមុន ការនាំចេញរបស់ចិនទៅកាន់សហរដ្ឋអាមេរិក មាន ទំហំជាទឹកប្រាក់ជាង ៥០៦ពាន់លានដុល្លារ៕
