(រ៉ង់ហ្គូន)៖ យន្ដហោះចម្បាំងមីយ៉ាន់ម៉ាមួយគ្រឿង បានធ្លាក់ខណៈពេលកំពុងដឹកនាំ ការបណ្ដុះបណ្ដាលហោះហើរមួយ នៅក្បែរភូមិគ្យុនកូណេ (Kyunkone) ស្ថិតនៅក្នុងទីក្រុង តងហ្គូ (Taungoo) នៃតំបន់បាហ្គោ (Bago) ភាគកណ្តាល ប្រទេសមីយ៉ាន់ម៉ា នៅម៉ោង ១១៖០០នាទីព្រឹកថ្ងៃអង្គារនេះ (ម៉ោងនៅរ៉ង់ហ្គូន) ដោយបានបណ្តាលឲ្យអាកាសយានិកម្នាក់ ដែលជាអ្នកបញ្ជាការហោះហើរនោះ បាត់បង់ជីវិត។ នេះបើតាមការចេញផ្សាយដោយ ទីភ្នាក់ងារសារព័ត៌មានចិន ស៊ីនហួរ នៅល្ងាចថ្ងៃអង្គារ ទី០៣ ខែមេសា ឆ្នាំ២០១៨។
យន្តហោះចម្បាំងខាងលើនេះ ជាប្រភេទយន្តហោះ F-7 ឬ Chengdu J-7 គឺជាយន្តហោះផលិតដោយចិន ដែលត្រូវបានមីយ៉ាន់យកមកធ្វើការហ្វឹកហ្វឺន ដល់មន្ត្រីទ័ពអាកាស នៅព្រឹកមិញនេះ។ ដោយឡែកមូលហេតុដែលបង្កឧប្បតិហេតុនេះឡើង គឺទំនងជាការហោះហើរខុសបច្ចេកទេស ព្រោះពេលកើតហេតុ ពីឡុតបានទទួលរងរបួសធ្ងន់រហូតដល់ស្លាប់ បន្ទាប់ពីការចុះឆ័ត្រយោង ចេញពីយន្តហោះដែលមានបញ្ហា៕
