(វ៉ាស៊ីនតោន)៖ សេតវិមានអាមេរិក បានរិះគន់ចិន​យ៉ាងខ្លាំង សម្រាប់ការ​តម្លើងពន្ធ​នាំចូល​លើ​ផលិតផលអាមេរិក ខណៈប្រធានាធិបតី លោក ដូណាល់ ត្រាំ បានចាត់ទុក​ថា ភាពតានតឹង​រវាងចិន និងសហរដ្ឋអាមេរិក​ គឺជាសត្រូវ​សេដ្ឋកិច្ច។ នេះបើតាម​ការចេញផ្សាយ​ដោយ សារព័ត៌មាន BBC នៅព្រឹកថ្ងៃអង្គារ ទី០៣ ខែមេសា ឆ្នាំ២០១៨។

កាលពីថ្ងៃចន្ទ​ម្សិលមិញ រដ្ឋាភិបាល​ទីក្រុងប៉េកាំង បានប្រកាស​តម្លើងពន្ធ ២៥ភាគរយ ឬស្មើនឹងជាង ០៣ពាន់លានដុល្លារ លើផលិតផល​ចំនួន ១២៨មុខ ក្នុងនោះ​រួមមាន ទាំងសាច់ជ្រូក និងស្រា ដែលនាំចូល​ពីសហរដ្ឋអាមេរិក ជាការឆ្លើយតប​ទៅនឹងការតម្លើងពន្ធ​លើដែក និង​អាលុយមីញ៉ូមរបស់ លោក ដូណាល់ ត្រាំ។ លើសពីនេះ​ទៅទៀត ចិនបានចាត់ទុក​ថា ការចាត់វិធានការ​បែបនេះ ធ្វើឡើងក្នុងគោល​បំណង ការពារផល​ប្រយោជន៍​របស់ខ្លួន​តែប៉ុណ្ណោះ។

យ៉ាងណាក៏ដោយ សេតវិមានបាន​រិះគន់យ៉ាងខ្លាំង​ ចំពោះការ​សម្រេចចិត្តនេះ ដោយចាត់ទុកថា វាធ្វើឱ្យខូចខាត​ដល់ទីផ្សារសកល​លោក។ «ការឧបត្ថម្ភ​របស់ចិន និងការបន្តលក់​ផលិតលើស​ពីសមត្ថភាព គឺជាមូលហេតុ​នៃវិបត្តិដែកថែប... ដូច្នេះជំនួស​ឱ្យការដាក់ គោលដៅ​លើការនាំចេញ​របស់សហរដ្ឋអាមេរិក​ ប្រកបដោយ​តម្លាភាព ចិនគួរតែ​បញ្ឈប់ការអនុវត្ត​ ពាណិជ្ជកម្មមិន​ស្មើភាព​របស់ខ្លួន ដែលកំពុង​បំផ្លាញ​ដល់​សន្តិសុខ​ជាតិ​អាមេរិក និងធ្វើឱ្យខូចខាត​ដល់ទីផ្សារ​សកលលោក»។ នេះបើសម្តីតាមអ្នក​នាំពាក្យ​សេតវិមាន លោកស្រី លីនសេយ៍ វ៉លធើស៍ (Lindsay Walters)។

គួរបញ្ជាក់ថា ក្រោយចិន​ចាត់វិធានការតម្លើងពន្ធ ភាគហ៊ុនអាមេរិក និងអាស៊ីបាន​ធ្លាក់ដាំ​ក្បាលចុះ។ ផ្សារហ៊ុន Wall Street​ បាន​ធ្លាក់ចុះ ២.២ភាគរយ ខណៈទីផ្សារភាគហ៊ុននៅ​អាស៊ី Nikkei របស់ជប៉ុន​ធ្លាក់ចុះ ១.៥ភាគរយ នៅថ្ងៃអង្គារនេះ៕