(រីយ៉ាដ)៖ ព្រះអង្គម្ចាស់រាជទាយាទអារ៉ាប៊ីសាអូឌីត ម៉ូហាម៉េដ ប៊ីន សាល់ម៉ាន់ (Mohammed Bin Salman) បានមានបន្ទូលថា ព្រះអង្គទទួលស្គាល់សិទ្ធិរបស់ អ៊ីស្រាអែលក្នុងនាមជារដ្ឋមួយ ដែលនេះបានបង្ហាញកាន់តែច្បាស់ពីចេតនារបស់អនាគតស្តេចថ្មីអង្គនេះ ក្នុងការធ្វើឱ្យប្រសើរឡើង នូវទំនាក់ទំនងជាមួយទីក្រុង តែលអាវីវ ខណៈអំពើហិង្សារវាងអ៊ីស្រាអែល និងប៉ាឡេស្ទីនកំពុងផ្ទុះឡើងវិញ។ នេះបើតាមការចេញផ្សាយដោយ សារព័ត៌មាន Bloomberg នៅព្រឹកថ្ងៃអង្គារ ទី០៣ ខែមេសា ឆ្នាំ២០១៨។
ព្រះអង្គម្ចាស់ Bin Salman ធ្វើការកត់សម្គាល់ដ៏ភ្ញាក់ផ្អើលបែបនេះ នៅក្នុងបទសម្ភាសន៍ជាមួយអ្នកសារព័ត៌មាន ចេហ្វហ្វ្រេយ ហ្គោលប៊ឺក (Jeffrey Goldberg) ដែលត្រូវបានចេញផ្សាយកាលពីថ្ងៃចន្ទ។ ថ្លែងនាឱកាសនោះ រាទាយាទអង្គនេះបានគូសបញ្ជាក់យ៉ាងដូច្នេះថា «ខ្ញុំជឿថា ប៉ាឡេស្ទីន និងអ៊ីសា្រអែល មានសិទ្ធិកាន់កាប់ទឹកដី ផ្ទាល់ខ្លួនរបស់ពួកគេ... ប៉ុន្តែយើងក៏ត្រូវតែមានផងដែរ នូវកិច្ចព្រមព្រៀងសន្តិភាព ដែលធានាស្ថេរភាពសម្រាប់អ្នកគ្រប់គ្នា និងធ្វើឱ្យមានទំនាក់ទំនងជាធម្មតា»។
គួរបញ្ជាក់ថា ការថ្លែងបែបនេះរបស់ព្រះអង្គម្ចាស់ Mohammed Bin Salman កើតមានឡើងនៅចំពេលអំពើហិង្សារវាងប៉ាឡេស្ទីន និងអ៊ីស្រាអែលបានផ្ទុះឡើងជាថ្មីក្នុងតំបន់ហ្កាហ្សា ដោយបណ្ដាលឱ្យជនជាតិ ១៧នាក់ស្លាប់ និងរាប់ពាន់នាក់រងរបួស ដោយសារគ្រាប់កាំភ្លើងរបស់យោធាអ៊ីស្រាអែល៕
