(ហ្សាការតា)៖ មាន​សេចក្តីរាយការណ៍ថា ប្រទេសឥណ្ឌូណេស៊ី​ដែលជាអតិថិជន​​ធំបំផុត​របស់ Facebook ប្រចាំតំបន់​អាស៊ីអាគ្នេយ៍ ឬជាប្រទេសអ៊ីស្លាម​ធំបំផុតលើលោក ដែលអនុញ្ញាត​ឲ្យប្រជាជាន​លេង Facebook នោះ បានព្រមាន​ថា ខ្លួននឹងបិទបណ្តាញ​សង្គមបែបកម្សាន្ត-ពាណិជ្ជកម្ម មានប្រភពនៅអាមេរិកនេះចោទភ្លាម ប្រសិន​បើព័ត៌មាន​ផ្ទាល់ខ្លួនរបស់អ្នកប្រើប្រាស់ នៅ​ឥណ្ឌូណេស៊ី ត្រូវបាន​រំលោភ​បំពាន។ នេះបើតាម​ការចេញ​ផ្សាយ​ដោយ Channel News Asia ដកស្រង់ពី​បណ្តាញព័ត៌មាន Reuters នាព្រឹកថ្ងៃអង្គារ ទី០៣ ខែមេសា ឆ្នាំ២០១៨។

ការបញ្ជាក់ដូចខាងលើនេះ ធ្វើឡើងនៅកិច្ចសម្ភាសន៍រវាង បណ្តាញព័ត៌មាន​ពាណិជ្ជកម្ម Bloomberg ជាមួយនឹង​​រដ្ឋមន្ត្រីទូរគមនាគមន៍ និងទំនាក់ទំនងឥណ្ឌូណេស៊ី លោក រូឌានតារា (Rudiantara) ចំពោះមុខ​​អ្វីដែល Facebook បាននិងកំពុងតែធ្វើ ក្នុងការបោសសម្អាតព័ត៌មាន​មិនពិត តាមរយៈការ​​បើក​​ដៃ​ឲ្យមាន​​ការចូលពិនិត្យ​មើលព័ត៌មាន​សម្ងាត់ ឬព័ត៌មានឯកជន របស់អ្នកប្រើប្រាស់ ដោយគ្មាន​ការអនុញ្ញាត​ពីពួកគេនោះ។

ជុំវិញបញ្ហាខាងលើនេះ មន្ត្រីជាន់ខ្ពស់នៃរដ្ឋាភិបាលឥណ្ឌូណេស៊ីខាងលើបានអះអាង​ច្បាស់ថា «ប្រសិនបើខ្ញុំតម្រូវឲ្យបិទ (Facebook) នោះខ្ញុំនឹងធ្វើវា។ ឥណ្ឌូណេស៊ី​នឹងធ្វើបែបនេះ ប្រសិនបើខ្លួនទទួលបានព័ត៌មានថា ទិន្នន័យនៃអ្នកប្រើប្រាស់ របស់ឥណ្ឌូណេស៊ី ត្រូវបានរំលោភបំពាន...»។ លោក រូឌានតារា បានសង្កត់ធ្ងន់ថា ឥណ្ឌូណេស៊ីធ្លាប់បិទបណ្តាញសង្គម Telegram របស់រុស្ស៊ីមួយទៅហើយ ដូច្នេះរឿងបិទ Facebook គ្មានអ្វីដែលលោកស្ទាក់ស្ទើរនោះឡើយ។

គួរបញ្ជាក់ថា ជុំវិញការចោទប្រកាន់អំពី ការអនុញ្ញាត​ឲ្យ​មានការលូកដៃ​ចូល​យក​ព័ត៌មានសម្ងាត់ របស់អ្នកប្រើប្រាស់​ប្រមាណជាង ៥០លាននាក់ ដែលទើប​ត្រូវបានបែកធ្លាយ​​កាលពីខែមុននេះ វាបានក្លាយ​ជាព្យុះភ្លៀងបោកបក់ Facebook យ៉ាងខ្លាំងមិនធ្លាប់មាន និងបាន​ធ្វើឲ្យបណ្តាញសង្គមយក្សលេខ ១ ប្រចាំពិភពលោកនេះ ខាត​បង់ប្រាក់រាប់​ពាន់លានដុល្លារ ក្នុងតម្លៃ​ជាភាគហ៊ុន។ បន្ថែមពីនេះ​ លោក Mark Zuckerberg ដែល​ជាបិតា​ស្ថាបនិក និងនាយក​ប្រតិបត្តិ ក៏កំពុងប្រឈមមុខ​នឹងការឡើង​ស្រាយបំភ្លឺ មុខសភា​អាមេរិក ព្រមទាំងបាន​សុំទោសដល់​ពិភពលោក​ទាំងមូល​ថែមទៀត៕