(រ៉ង់ហ្គូន)៖ ប្រធានក្រុមប្រឹក្សារដ្ឋមីយ៉ាន់ម៉ា លោកស្រី អោងសាន ស៊ូជី បានអំពាវនាវឱ្យប្រជាជនមីយ៉ាន់ម៉ាទាំងអស់ ប្រមូលកម្លាំងគ្នាដើម្បីយកឈ្នះ លើបញ្ហាប្រឈមជាច្រើនរបស់ប្រទេសជាតិ នៅក្នុងប្រតិទិនឆ្នាំថ្មីមីយ៉ាន់ម៉ា ១,៣៨០ ដែលនឹងចាប់ផ្ដើមនៅថ្ងៃទី១៧ ខែមេសា ឆ្នាំ២០១៨។ នេះបើតាមការចេញផ្សាយដោយ ទីភ្នាក់ងារសារព័ត៌មានចិន ស៊ីនហួរ នៅល្ងាចថ្ងៃចន្ទ ទី០២ ខែមេសា ឆ្នាំ២០១៨។
ថ្លែងក្នុងសុន្ទរកថាមួយកាលពីថ្ងៃអាទិត្យ ទៅកាន់ជនរួមជាតិមីយ៉ាន់ម៉ា លោកស្រី អោងសាន ស៊ូជី បានលើកឡើងយ៉ាងដូច្នេះថា «ការប្រមូលកម្លាំងគ្នា គឺជាកាតា្តដ៏សំខាន់ក្នុងការកសាងប្រទេសជាតិ និងរក្សាសន្តិភាពដែលយើងគ្រប់គ្នាត្រូវការ»។ ព្រមពេលជាមួយគ្នា លោកស្រី ក៏បានសង្កត់ធ្ងន់ផងដែរ លើភាពចាំបាច់នៃការយោគយល់ និងគោរពគ្នាទៅវិញទៅមក ជាមូលដ្ឋាននៃការបញ្ចប់ជម្លោះប្រដាប់អាវុធ អស់រយៈពេលជាច្រើនឆ្នាំមកនេះ រវាងកងកម្លាំងមីយ៉ាន់ម៉ាន់ និងក្រុមឧទ្ទាមប្រដាប់អាវុធមួយចំនួននៅក្នុងស្រុក។
ដោយឡែក ជុំវិញការបោះឆ្នោតជ្រើសរើស លោក យូ វីន ម្យីនស៍ (U Win Myint) ជាប្រធានាធិបតីមីយ៉ាន់ម៉ាថ្មី កាលពីសប្ដាហ៍មុន លោកស្រី ស៊ូជី បាននិយាយថា វាបង្ហាញពីភាពចាស់ទុំ នៃលទ្ធិប្រជាធិបតេយ្យ និងដំណើរការនយោបាយនៅមីយ៉ាន់ម៉ា។ ប៉ុន្តែខណៈកំពុង ទទួលរងការរិះគន់ ពីសំណាក់សហគមន៍អន្តរជាតិ ទាក់ទិននឹងវិបត្តិជនជាតិដើមភាគតិចរ៉ូហ៊ីងយ៉ា ប្រធានក្រុមប្រឹក្សារដ្ឋរូបនេះមិនបានបង្ហាញ ពីគោលជំហររឹងមាំណាមួយដើម្បីដោះស្រាយវិបត្តិនេះទេ។
គួររំលឹកថា គណបក្ស NLD របស់លោកស្រី អោងសាន ស៊ូជី ទទួលបានជ័យជម្នះភ្លូកទឹកភ្លូកដី នៅក្នុងការបោះឆ្នោតសកលកាលពី ឆ្នាំ២០១៥ ហើយរដ្ឋាភិបាលប្រជាធិបតេយ្យរបស់លោកស្រី បានឡើងកាន់អំណាចនៅខែមេសា ឆ្នាំ២០១៦៕
