(ម៉ូស្គូ)៖ យោធារុស្ស៊ី បានបាញ់សាកល្បងប្រកបដោយជោគជ័យនូវ ប្រព័ន្ធប្រឆាំងមីស៊ីលផ្លោងទំនើបចុងក្រោយបំផុតរបស់ខ្លួន នៅក្នុងប្រទេសកាហ្សាក់ស្ថាន។ នេះបើតាមសារព័ត៌មាន Krasnaya Zvezda ដកស្រង់ដោយ ទីភ្នាក់ងារព័ត៌មានចិន ស៊ីនហួរ នៅរសៀលថ្ងៃចន្ទ ទី០២ ខែមេសា ឆ្នាំ២០១៨។
សារព័ត៌មាន Krasnaya Zvezda តាមរយៈការស្រង់សម្ដីពីមេបញ្ជាការ រងនៃកងទ័ពអាកាសរុស្ស៊ី លោក អាន់ដ្រេយ ព្រីកហូដកូ (Andrey Prikhodko) បានឱ្យដឹងថា ប្រព័ន្ធមីស៊ីលប្រឆាំងមីស៊ីលផ្លោងទំនើបចុងក្រោយបំផុត ត្រូវបានបាញ់សាកល្បងដោយជោគជ័យ ជាមួយការបាញ់ចំគោលដៅក្នុងពេលវេលាកំណត់មួយដ៏ល្អឥតខ្ចោះ។
សារព័ត៌មានមួយនេះក៏បានបន្ថែមដែរថា ប្រព័ន្ធកម្ទេចមីស៊ីលនេះ មានបំពាក់ដោយ ប្រព័ន្ធទំនាក់ទំនង ដែលត្រូវបានរចនាឡើង ដើម្បីការពារទីក្រុងម៉ូស្គូ ប្រឆាំងនឹងការវាយប្រហារតាមផ្លូវអាកាស ពីសំណាក់សត្រូវ ហើយមិនតែប៉ុណ្ណោះ វាក៏អាចដើរតួជា ប្រព័ន្ធប្រកាសអាសន្នពីការវាយប្រហារដោយគ្រាប់មីស៊ីល និងគ្រប់គ្រងដែនអាកាសផងដែរ៕
