(ម៉ូស្គូ)៖ អភិបាលក្រុង Kemerovo នៃប្រទេសរុស្ស៊ី ​លោក Aman Tuleyev បានសម្រេចចិត្តលាលែងចេញពីតំណែងហើយ នៅថ្ងៃអាទិត្យនេះ បន្ទាប់ពីមានអគ្គីភ័យឆេះផ្សារទំនើបនៅក្នុងតំបន់សម្លាប់មនុស្ស ៦៤នាក់។ នេះបើតាមការចេញផ្សាយដោយ សារព័ត៌មាន Sputnik នៅថ្ងៃអាទិត្យ ទី០១ ខែមេសា ឆ្នាំ២០១៨។

«លោក Aman Tuleyev បានឡើងកាន់តំណែងជាអភិបាលក្រុង Kemerovo​ តាំងតែពីឆ្នាំ១៩៩៧ ហើយអណត្តិរបស់លោក បច្ចុប្បន្ននឹងត្រូវបញ្ចប់នៅឆ្នាំ២០២០។ ប៉ុន្តែ​ លោកបានសម្រេចចិត្តលាលែងពីតំណែងជាអភិបាលក្រុង ដោយគោលការណ៍ស្ម័គ្រ ចិត្តមុននឹងអណត្តិរបស់លោកត្រូវបញ្ចប់»។ នេះបើតាមការិយាល័យរបស់ លោក Aman Tuleyev​ ថ្លែងប្រាប់ Sputnik។

គួរបញ្ជាក់ថា ការលាលែងរបស់លោក Aman Tuleyev​ កើតមានឡើងបន្ទាប់ពីមានអគ្គិភ័យឆាបឆេះផ្សារទំនើប Winter Cherry កាលពីចុងសប្ដាហ៍មុន ដោយសម្លាប់មនុស្ស៦៤នាក់ ក្នុងនោះមានកុមារ៤១នាក់។ ក្រុមអ្នកស៊ើបអង្កេត បានអះអាងថាច្រកចេញ ចូល ពេលមានអគ្គីភ័យត្រូវបានបិទ ហើយប្រព័ន្ធប្រកាសអាសន្នក៏មិនដំណើរការណ៍ ជាហេតុធ្វើឱ្យកុមារជាច្រើននាក់ត្រូវជាប់គាំង នៅក្នុងរោងកុន។ ចំណែកឯ ប្រធានាធិបតីរុស្ស៊ី លោក វ្ល៉ាឌីមៀ ពូទីន ក៏បាននិយាយដែរថា អគ្គីភ័យនេះបណ្ដាលមកពីការធ្វេស ប្រហែស ហើយថាអ្នកទទួលខុសត្រូវគួរតែត្រូវទទួលការពិន័យ៕