(វ៉ាស៊ីនតោន)៖ នាយកទំនាក់ទំនងសេតវិមាន និងជាអតីតតារាម៉ូដែល លោកស្រី ហូប ហ៊ីកស៍ (Hope Hicks) បានលាលែងពីតំណែងជាផ្លូវការហើយ ជាមួយការជូនដំណើរលាគ្នាដោយផ្ទាល់ ពីសំណាក់ប្រធានាធិបតីអាមេរិក លោក ដូណាល់ ត្រាំ។ នេះបើតាមការចេញផ្សាយដោយ ទីភ្នាក់ងារសារព័ត៌មានចិន ស៊ីនហួរ នៅរសៀលថ្ងៃសុក្រ ទី៣០ ខែមីនា ឆ្នាំ២០១៨។
លោក ដូណាល់ ត្រាំ និងលោកស្រី Hope Hicks បានបង្ហាញខ្លួននៅចំពោះមុខកាមេរ៉ា នាថ្ងៃព្រហស្បតិ៍សប្តាហ៍នេះ នៅឯខាងក្រៅការិយាល័យប្រធានាធិបតី ក្នុងថ្ងៃចុងក្រោយដែលលោកស្រីស្ថិតនៅសេតវិមាន អមដោយការចាប់ដៃ និងថើបថ្ពាល់លាពីគ្នាជាមួយ លោក ត្រាំ ថែមទៀតផង។
លោកស្រី Hicks បានប្រកាសលាលែងពីតំណែង ជានាយកទំនាក់ទំនងសេតវិមាន កាលពីខែកុម្ភៈកន្លងទៅ បន្ទាប់ពីមន្ត្រីជាន់ខ្ពស់សេតវិមាន លោក រ៉ូប ផរធើ (Rob Porter) ត្រូវបានគេចោទប្រកាន់ថា បានប្រព្រឹត្តអំពើហិង្សាក្នុងគ្រួសារ។ តែក្រោយមកទៀត លោក Porter ដែលបានច្រានចោល រាល់ការចោទប្រកាន់មកលើរូបលោក ស្រាប់តែធ្លាក់ចូលក្នុងរឿងអាស្រូវមួយផ្សេងទៀត ដែលបានចោទថា លោកលួចមានទំនាក់ទំនងស្នេហាជាមួយ លោកស្រី Hicks រូបនេះតែម្តង រហូតដល់ជំរុញឱ្យលោកលាលែងពីតំណែង។
តែទោះជាបែបនេះក្ដី ខាងសេតវិមានបានចេញមុខអះអាងថា ការលាលែងពីតំណែងរបស់ លោកស្រី Hope Hicks មិនមានជាប់ពាក់ព័ន្ធនឹងរឿងអាស្រូវទាំងនេះទេ។ លោកស្រី គឺជាមនុស្សជំនិតម្នាក់ដ៏យូរអង្វែងរបស់លោក ដូណាល់ ត្រាំ តាំងតែពីមុនលោក ក្លាយជាប្រធានាធិបតីអាមេរិកមកម្ល៉េះ៕
