(អាមេរិក)៖ បើតាមការចុះផ្សាយរបស់សារព័ត៌មាន BuzzFeed អគ្គនាយករងរបស់ក្រុមហ៊ុន Facebook បាននិយាយក្នុងសារអ៊ីម៉ែលផ្ទៃក្នុងមួយកាលពីឆ្នាំ២០១៦ថា បណ្តាញសង្គមយក្សនេះ ត្រូវតែធ្វើយ៉ាងណា គិតគូរការបង្កើនចំនួនអ្នកប្រើប្រាស់ លើសពីអ្វីៗផ្សេងទាំងអស់ ទោះបីជាវាអាចបង្កផលប៉ះពាល់វិជ្ជមានមួយចំនួនក៏ដោយ ដែលសេចក្តីរាយការណ៍នេះ បានញ៉ាំងឲ្យអគ្គនាយករងរូបនោះ ព្រមទាំងនាយកប្រតិបត្តិ (CEO) របស់ Facebook លោក ម៉ាក ហ្សាក់ខឺប៊ឺក (Mark Zuckerberg) បដិសេធមិនទទួលស្គាល់ភ្លាមៗ។ នេះបើតាមការចេញផ្សាយដោយ សារព័ត៌មាន Channel News Asia នៅរសៀលថ្ងៃសុក្រ ទី៣០ ខែមីនា ឆ្នាំ២០១៨។
អគ្គនាយករង Facebook លោក អាន់ឌ្រូ បូសវ៉ស (Andrew Bosworth) កាលពីខែមិថុនា ឆ្នាំ២០១៦ បានសរសេរក្នុងសារអ៊ីម៉ែលខាងលើថា ការអនុវត្តន៍ដែលអាចថាមិនសមគួរមួយចំនួន គឺមិនថ្វីនោះឡើយ ប្រសិនបើលទ្ធផលបានមក គឺជាការតភ្ជាប់ទំនាក់ទំនងរវាងអ្នកប្រើប្រាស់ ដូច្នេះហើយរាល់កិច្ចការដែលពួកយើងធ្វើ ដើម្បីបង្កើនចំនួនអ្នកប្រើប្រាស់ គឺអាចលើកហេតុផលយកមកការពារបាន។
ក្រៅពីនេះ លោក Bosworth ក៏បានជំរុញបុគ្គលិកក្រុមហ៊ុន សិក្សាពីភាពអវិជ្ជមាននានា ដែលជាកត្តាធ្វើឲ្យពួកគេចុះខ្សោយសមត្ថភាពការងារផងដែរ។ ក្នុងខ្លឹមសារនៃសារអ៊ីម៉ែលនោះ លោក Bosworth ក៏មាននិយាយផងដែរថា ប្រហែលជាមានមនុស្សស្លាប់ នៅក្នុងការវាយប្រហារភេរវកម្ម ដែលរៀបចំឡើងតាមរយៈបណ្តាញសង្គមរបស់យើង ប៉ុន្តែទោះជាបែបនេះក្តី យើងនៅតែភ្ជាប់ទំនាក់ទំនងរវាងមនុស្ស។
ជុំវិញរឿងនេះ លោក Mark Zuckerg បានផ្តល់ការគាំទ្រដល់ Bosworth ដោយថា លោកគឺជាមេដឹកនាំដែលប្រកបដោយទេពកោសល្យម្នាក់ ប៉ុន្តែលោក មិនជឿជាក់ថា ការប្រើប្រាស់វិធីសាស្រ្តមិនគួរគប្បី ដើម្បីសម្រេចលទ្ធផល ជារឿងត្រូវនោះឡើយ។ លោក Bosworth បានបញ្ជាក់ថា សារអ៊ីម៉ែលនោះ គឺជារបស់លោកមែន ប៉ុន្តែខ្លឹមសាររបស់វា គឺមានគោលដៅតែដើម្បីជំរុញឲ្យការជជែកដេញដោល ជុំវិញការលើកឡើងទាំងនោះប៉ុណ្ណោះ ហើយលោកមិនយល់ស្របចំពោះវាឡើយ សូម្បីតែនៅពេលដែលលោក កំពុងសរសេរសារអ៊ីម៉ែលនោះ។
គួរជម្រាបថា បច្ចុប្បន្ន Facebook កំពុងរងការរិះគន់ និងសម្ពាធយ៉ាងធ្ងន់ធ្ងរ ជុំវិញការដែលបណ្តាញសង្គមយក្សនេះ អនុញ្ញាតឲ្យក្រុមហ៊ុនប្រឹក្សាផ្នែកនយោបាយ Cambrige Analytica ពិនិត្យព័ត៌មានផ្ទាល់ខ្លួនរបស់អ្នកប្រើប្រាស់ប្រមាណ ៥០លាននាក់ ដែលភាពរំជើបរំជួលនេះ ធ្វើឲ្យ Facebook ខាតបង់ភាគហ៊ុន ១០០ពាន់លានដុល្លារទៅហើយ គិតត្រឹមថ្ងៃពុធសប្តាហ៍នេះ។ បន្ថែមពីនេះ លោក Mark Zuckerberg ត្រូវគេរំពឹងថា នឹងចូលផ្តល់សក្ខីកម្មនៅចំពោះមុខព្រឹទ្ធសភាអាមេរិក ឆាប់បំផុតនៅខែមេសាខាងមុខ ដើម្បីបកស្រាយនូវរាល់ការចោទប្រកាន់នានា ចំពោះបណ្តាញសង្គមយក្សលេខ ១ លើលោកនេះ៕
