(អាមេរិក)៖ នាថ្ងៃអាទិត្យសប្តាហ៍នេះ យន្តហោះដឹកជញ្ជូនមួយគ្រឿង ដែលមានផ្ទុកទំនិញតម្លៃ ១.៥ពាន់លានដុល្លារ នឹងហោះចាកចេញពីបន្ទាយយោធា Andrews ក្បែររដ្ឋធានីវ៉ាស៊ីនតោន ឆ្ពោះទៅកាន់ជ្រោយ Canaveral នៃរដ្ឋផ្លូរីដា។ នៅលើនោះ គឺជាយានអវកាសមួយគ្រឿង ដែលនឹងត្រូវទៅធ្វើការសិក្សាស្រាវជ្រាវកៀកនឹងព្រះអាទិត្យ នាប៉ុន្មានខែខាងមុខនេះ។ នេះបើតាមការចេញផ្សាយដោយ វែបសាយ Wired នៅព្រឹកថ្ងៃសុក្រ ទី៣០ ខែមីនា ឆ្នាំ២០១៨។
យានអវកាស Parker Solar ដែលត្រូវបានរចនា និងកសាងឡើងដោយមន្ទីរពិសោធន៍នៃសាកលវិទ្យាល័យ Johns Hopkins និងគ្រប់គ្រងរៀបចំដោយទីភ្នាក់ងារអវកាសអាមេរិក NASA ត្រូវបានគេគ្រោងនឹងបាញ់បង្ហោះនាថ្ងៃទី៣១ ខែកក្កដា តាមរយៈគ្រាប់រ៉ុក្កែត Delta IV ចេញពីមជ្ឈមមណ្ឌលអវកាស Kennedy នៃរដ្ឋផ្លូវរីដា។
នៅក្នុងដំណើរផ្សងព្រេងរបស់វា ទៅកាន់ព្រះអាទិត្យ Parker នឹងឈានដល់ល្បឿន ៧២៤,២០៤គីឡូម៉ែត្រ ក្នុងមួយម៉ោង តាមរយៈការប្រើប្រាស់ទំនាញរបស់ភពសុក្រ (Venus) ដើម្បីធ្វើជាកម្លាំងរុញច្រានបន្ថែម។ ល្បឿនដ៏លឿននេះ នឹងអាចឲ្យយានអវកាស Parker ឆ្លងកាត់បរិយាកាសអាក្រក់ៗរបស់ព្រះអាទិត្យ ឬក៏តំបន់ Corona នៅត្រឹមចម្ងាយតែជាង ០៦លានគីឡូម៉ែត្រ ប៉ុណ្ណោះពីផ្ទៃរបស់ព្រះអាទិត្យ ខណៈវាគឺជារយៈចម្ងាយដ៏កៀកបំផុត ដែលយានអវកាស ធ្លាប់បានទៅក្បែរដុំបាល់ភ្លើងយក្សមួយនេះ។
គួរជម្រាបថា នៅទីនោះយាន Parker នឹងធ្វើការប្រមែប្រមូលទិន្នន័យ ដែលអនុញ្ញាតឲ្យអ្នកវិទ្យាសាស្រ្ត បង្កើនការយល់ដឹង និងអាចព្យាករណ៍ការកើតមាន នៃកំសួលអណ្តាតភ្លើងព្រះអាទិត្យ (Solar Flares) ឬព្យុះព្រះអាទិត្យ (Solar Wind/Storm) ដែលអាចបង្កការបំផ្លិចបំផ្លាញដល់ប្រព័ន្ធទំនាក់ទំនងនៅលើភពផែនដី។
យានអវកាសដែលចំណាយពេល ០៤ឆ្នាំ ដើម្បីកសាងឡើងនេះត្រូវគេរំពឹងថា នឹងអាចធ្វើប្រតិបត្តិការបានរយៈពេលយ៉ាងតិច ០៧ឆ្នាំ នៅទីអវកាស ហើយអាចផ្តល់ចម្លើយដល់សំណួរសំខាន់ៗ អំពីរឿងៗចម្លែករបស់ព្រះអាទិត្យ ប៉ុន្តែវានៅតែស្ថិតនៅក្នុងគោលដៅធំមួយ នោះគឺអង្កេតសកម្មភាពនានារបស់ព្រះអាទិត្យ ដើម្បីបង្ការការគំរាមកំហែងណាមួយដល់ផែនដី និងអាចឲ្យមនុស្សធ្វើការវិភាគសកម្មភាពស្រទាប់នៃព្រះអាទិត្យ បានកាន់តែប្រសើរជាងមុន៕
