(យូអិន)៖ អគ្គលេខាធិការ នៃអង្គការសហប្រជាជាតិ លោក អាន់តូនីញ៉ូ ហ្គួទែរ៉ែស (Antonion Guterres) បានធ្វើការសង្កត់ធ្ងន់ថា ប្រទេសចិនគឺជាអ្នកចូលរួមដ៏សំខាន់បំផុតមួយ នៅក្នុងការដោះស្រាយបញ្ហានៅឧបទ្វីបកូរ៉េ ដែលលោកចង់សំដៅទៅលើ បញ្ហាអាវុធនុយក្លេអ៊ែរកូរ៉េខាងជើង នោះតែម្តង។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នាព្រឹកថ្ងៃសុក្រ ទី៣០ ខែមីនា ឆ្នាំ២០១៨។
អគ្គលេខាធិការ UN និងជាអតីតនាយករដ្ឋមន្ត្រីប្រទេសព័រទុយហ្កាល់រូបនេះ បានលើកឡើងនៅឯទីស្នាក់ការកណ្តាលរបស់លោក នៅបុរីញូយ៉កសហរដ្ឋអាមេរិកថា «ខ្ញុំពិតជាទទួលបាន ការលើកទឹកចិត្តយ៉ាងខ្លាំងក្លាបំផុត ដោយសារតែការបំពេញទស្សនកិច្ច របស់មេដឹកនាំកំពូលកូរ៉េខាងជើង (លោក គីម ជុងអ៊ុន) ទៅកាន់ប្រទេសចិន។ ខ្ញុំគិតថា ប្រទេសចិន គឺអ្នកដែលចូលរួមយ៉ាងសំខាន់ខ្លាំងណាស់ ចំពោះការដោះស្រាយបញ្ហានៅក្នុងតំបន់នេះ»។
លោក ហ្គួទែរ៉ែស បានបញ្ជាក់បន្ថែមទៀតថា «ខ្ញុំជឿជាក់ថា ពិភពលោកនេះ នៅមានបញ្ហាជាច្រើន ដែលមិនទាន់មានដំណោះស្រាយគ្រប់គ្រាន់នៅឡើយ ដូច្នេះខ្ញុំគិតថា វាជាឱកាសសម្រាប់ការបង្កើតដំណោះស្រាយសន្តិភាព ទៅកាន់បញ្ហាដែលប៉ុន្មានខែមុនេះ គឺជាគ្រោះថ្នាក់ធំបំផុត ដែលយើងបានជួបប្រទះ»។
គួរបញ្ជាក់ថា លោក គីម ជុងអ៊ុន បានដឹកនាំមន្ត្រីជាន់ខ្ពស់ ធ្វើការបំពេញទស្សនកិច្ចនៅប្រទេសចិន ដែលជាសម្ព័ន្ធមិត្តធំបំផុតលេខ ១ របស់ខ្លួន ជាលើកដំបូង គិតចាប់តាំងពីលោកឡើងកាន់តំណែង កាលពីចុងឆ្នាំ២០១១ ហើយវាត្រូវបានចាត់ទុកជាភាពវិជ្ជមានខ្លាំងបំផុតមួយ ដែលប្រទេសជាច្រើន ដូចជាសហរដ្ឋអាមេរិក កូរ៉េខាងត្បូង និងសូម្បីតែអង្គការសហប្រជាជាតិ ក៏បានចេញសេចក្តីថ្លែងការណ៍ស្វាគមន៍ ព្រោះវាជំហានឆ្ពោះទៅរកការលុបបំបាត់អាវុធនុយក្លេអ៊ែរ និងភាពតានតឹងនៅឧបទ្វីបកូរ៉េ យ៉ាងពិតប្រាកដ៕
